മുന്‍ ഓസീസ് താരത്തിന്റെ ഏകദിന ഇലവനില്‍ നാല് ഇന്ത്യന്‍ താരങ്ങള്‍; സച്ചിന്‍ നാലാമന്‍, കോലി ആറാം നമ്പറില്‍

തനിക്ക് ഏറ്റവും പ്രിയപ്പെട്ട ലോക ഏകദിന ഇലവന്‍ തിരഞ്ഞെടുത്ത് ഓസ്‌ട്രേലിയയുടെ മുന്‍ പേസ് ബൗളറും നിലവിലെ അഫ്ഗാനിസ്ഥാന്‍ ക്രിക്കറ്റ് ടീം ബൗളിങ് കോച്ചുമായ ഷോണ്‍ ടൈറ്റ്. നാല് ഇന്ത്യന്‍ താരങ്ങള്‍ അടങ്ങുന്നതാണ് ഷോണ്‍ ടൈറ്റിന്റെ ഏകദിന ഇലവന്‍. സച്ചിന്‍ ടെന്‍ഡുല്‍ക്കര്‍, വിരേന്ദര്‍ സെവാഗ്, വിരാട് കോലി, എം.എസ്.ധോണി എന്നിവരാണ് നാല് ഇന്ത്യന്‍ താരങ്ങള്‍. അഞ്ച് ഓസീസ് താരങ്ങളും രണ്ട് പാക്കിസ്ഥാന്‍ താരങ്ങളും ഒരു വെസ്റ്റ് ഇന്‍ഡീസ് താരവുമാണ് ടൈറ്റിന്റെ ഏകദിന ഇലവനിലുള്ളത്. 

ആദം ഗില്‍ക്രിസ്റ്റും വിരേന്ദര്‍ സെവാഗുമാണ് ഓപ്പണര്‍മാര്‍. റിക്കി പോണ്ടിങ് മൂന്നാമതും സച്ചിന്‍ ടെന്‍ഡുല്‍ക്കര്‍ നാലാമതും. ബ്രയാന്‍ ലാറ അഞ്ചാം നമ്പറില്‍ എത്തുമ്പോള്‍ വിരാട് കോലി ആറാം നമ്പറിലേക്ക് ഇറങ്ങുന്നു. എം.എസ്.ധോണിയാണ് ഏഴാമന്‍. മൂന്ന് പേസര്‍മാരും ഒരു സ്‌പെഷ്യലൈസഡ് സ്പിന്നറുമാണ് ടൈറ്റിന്റെ ടീമിലുള്ളത്. ഷെയ്ന്‍ വോണ്‍ ആണ് സ്പിന്നര്‍. വസീം അക്രം, ഗ്ലെന്‍ മഗ്രാത്ത്, ഷോയ്ബ് അക്തര്‍ എന്നിവരാണ് പേസ് ബൗളര്‍മാര്‍.