ടി20 ക്രിക്കറ്റില്‍ ഇന്ത്യ കണ്ടെത്തിയ ഏറ്റവും മൂര്‍ച്ചയേറിയ ആയുധമാണ് സൂര്യകുമാര്‍ യാദവ്. അന്താരാഷ്ട്ര ക്രിക്കറ്റില്‍ അരങ്ങേറി ചുരുങ്ങിയ വര്‍ഷങ്ങളെ ആയിട്ടുള്ളുവെങ്കിലും തുടര്‍ച്ചയായി രണ്ട് വര്‍ഷക്കാലത്തിലേറെയാണ് സൂര്യ തന്നെയാണ് ഫോര്‍മാറ്റിലെ ഏറ്റവും മികച്ച ബാറ്റര്‍. ടി20 ക്രിക്കറ്റില്‍ ഇന്ത്യന്‍ സൂപ്പര്‍ താരമായ വിരാട് കോലി കുറിച്ച റെക്കോര്‍ഡ് നേട്ടം കോലിയുടെ പകുതി മത്സരങ്ങള്‍ മാത്രം കളിച്ച് സ്വന്തമാക്കിയിരിക്കുകയാണ് സൂര്യകുമാര്‍.
ശ്രീലങ്കക്കെതിരായ ടി20 പരമ്പരയിലെ ആദ്യ മത്സരത്തില്‍ പ്ലെയര്‍ ഓഫ് ദ മാച്ച് പുരസ്‌കാരം സ്വന്തമാക്കിയതോടെയാണ് സൂര്യകുമാര്‍ കോലിയുടെ റെക്കോര്‍ഡിനൊപ്പമെത്തിയത്. ടി20 ക്രിക്കറ്റില്‍ നിന്നും വിരമിച്ച 35കാരനായ ഇന്ത്യന്‍ സൂപ്പര്‍ താരമായ കോലി 125 മത്സരങ്ങളില്‍ നിന്നും 16 തവണയാണ് മത്സരത്തിലെ താരമായി തിരെഞ്ഞെടുക്കപ്പെട്ടത്. ഈ നേട്ടത്തിലെത്താന്‍ സൂര്യകുമാര്‍ യാദവിന് വേണ്ടിവന്നത് 69 മത്സരങ്ങള്‍ മാത്രമാണ്. നിലവില്‍ അന്താരാഷ്ട്ര ക്രിക്കറ്റില്‍ സജീവമായ താരങ്ങളില്‍ 91 മത്സരങ്ങളില്‍ നിന്നും 15 പ്ലെയര്‍ ഓഫ് ദ മാച്ച് പുരസ്‌കാരങ്ങളുമായി സിംബാബ്വെ താരമായ സിക്കന്ദര്‍ റാസയാണ് രണ്ടാമതുള്ളത്. 159 മത്സരങ്ങളില്‍ നിന്നും 14 പ്ലെയര്‍ ഓഫ് ദ മാച്ച് പുരസ്‌കാരങ്ങളുമായി രോഹിത് ശര്‍മ പട്ടികയില്‍ മൂന്നാം സ്ഥാനത്താണ്.
