ക്രിക്കറ്റ് ലോകത്ത് ഒരേയൊരു താരമാണ് അതിമാനുഷന്‍ എന്ന വിശേഷണം സ്വന്തമാക്കിയിട്ടുള്ളത്. ക്രിക്കറ്റടക്കം നിരവധി കായിക ഇനങ്ങളില്‍ മത്സരിച്ചിട്ടുള്ള ക്രിക്കറ്റില്‍ 360 ഡിഗ്രി പ്ലെയര്‍ എന്ന വിശേഷണം സ്വന്തമാക്കിയ എബ്രഹാം ബെഞ്ചമിന്‍ ഡിവില്ലിയേഴ്‌സായിരുന്നു ആ താരം. ഡിവില്ലിയേഴ്‌സിനൊരു വനിതാ രൂപമുണ്ടായിരുന്നെങ്കില്‍ അതിന് എല്ലിസ് പെറിയുടെ മുഖമായേന. എന്തെന്നാല്‍ ഓസ്‌ട്രേലിയന്‍ സീനിയര്‍ ക്രിക്കറ്റ് ടീമില്‍ വമ്പന്‍ താരമാകുന്നതിന് മുന്‍പ് 16 വയസ്സില്‍ ഓസ്‌ട്രേലിയക്കായി ഫിഫ ഫുട്‌ബോള്‍ ലോകകപ്പ് കളിച്ചിട്ടുള്ള താരമാണ് എല്ലിസ് പെറി. ഇന്നിപ്പോള്‍ എല്ലിസ് പെറി വിശേഷിപ്പിക്കപ്പെടുന്നത് വനിതാ ക്രിക്കറ്റിലെ എക്കാലത്തെയും മികച്ച താരമായിട്ടാണ്.
ബാറ്റിംഗിനൊപ്പം ബൗളിംഗിലും എതിര്‍ടീമിന് നാശം വിതയ്ക്കാന്‍ പെറിയ്ക്കാവും എന്നതിനാല്‍ പെറിയടങ്ങുന്ന ഒരു സംഘത്തെ തോല്‍പ്പിക്കുക എന്നത് ഒരു ടീമിനും എളുപ്പമല്ല. രാജ്യാന്തര ക്രിക്കറ്റില്‍ താരം നേടിയിട്ടുള്ള കിരീടങ്ങളുടെ എണ്ണം മാത്രം കണക്കിലെടുത്താല്‍ മതി എല്ലിസ് പെറിയെന്ന താരത്തിന്റെ റേയ്ഞ്ച് അറിയാന്‍. അതിനൊപ്പം ബൗളിംഗിലും ബാറ്റിംഗിലും താരത്തിന്റെ നേട്ടങ്ങള്‍ കൂടിയാകുമ്പോള്‍ ആരുടെയും കണ്ണുതള്ളും. ടി20 ക്രിക്കറ്റില്‍ 1000 റണ്‍സും 100 വിക്കറ്റും സ്വന്തമാക്കുന്ന ആദ്യ താരം, ഓസ്‌ട്രേലിയക്കായി ടെസ്റ്റില്‍ ഇരട്ടസെഞ്ചുറി. ഏകദിനത്തില്‍ 150 വിക്കറ്റ് തുടങ്ങി പെറിയുടെ പേരിലുള്ള നേട്ടങ്ങള്‍ അനവധിയാണ്. വനിതാ പ്രീമിയര്‍ ലീഗ് സ്വന്തമാക്കും മുന്‍പുള്ള കിരീടനേട്ടങ്ങളും അനവധി.
ഏകദിന ലോകകപ്പില്‍ 2013,2022 വര്‍ഷങ്ങളിലെ കിരീടങ്ങളാണ് എല്ലിസ് പെറി സ്വന്തമാക്കിയിട്ടുള്ളത്. 2 ഏകദിന ലോകകപ്പ് കിരീടങ്ങളും 6 ടി20 ലോകകിരീടങ്ങളുമാണ് പെറിയുടെ പേരിലുള്ളത്. 2010,2012,2014,2018,2020,2023 വര്‍ഷങ്ങളിലാണ് പെറി ടി20 ലോകകപ്പ് കിരീടങ്ങള്‍ സ്വന്തമാക്കിയത്. ഇത് കൂടാതെ ഓസ്‌ട്രേലിയന്‍ ബിഗ് ബാഷ് ലീഗില്‍ 2 കിരീടം സ്വന്തമാക്കാനും എല്ലിസ് പെറിക്ക് സാധിച്ചിട്ടുണ്ട്. 2011-2020 കാലഘട്ടത്തിലെ ഐസിസിയുടെ ദശാബ്ദത്തിലെ മികച്ച ഏകദിന,ടി20 ക്രിക്കറ്റര്‍ക്കുള്ള പുരസ്‌കാരവും എല്ലിസ് പെറിയുടെ ഷെല്‍ഫിലുണ്ട്. ഇത് കൂടാതെ മികച്ച താരത്തിനുള്ള നിരവധി വാര്‍ഷിക പുരസ്‌കാരങ്ങളും പെറി സ്വന്തമാക്കിയിട്ടുണ്ട്.
