എന്തുകൊണ്ട് വിരാട് കോലിയും രോഹിത് ശർമയും ഇല്ല? കാരണം വ്യക്തമാക്കി ഹാർദ്ദിക്

വെസ്റ്റിന്‍ഡീസിനെതിരായ രണ്ടാം ഏകദിനത്തിനുള്ള ഇന്ത്യയുടെ പ്ലേയിംഗ് ഇലവനില്‍ ടീമിലെ സീനിയര്‍ താരങ്ങളായ വിരാട് കോലി, രോഹിത് ശര്‍മ എന്നിവര്‍ ഇല്ലായിരുന്നു. ലോകകപ്പിന് മുന്‍പ് സീനിയര്‍ താരങ്ങളില്ലാതെ ഇന്ത്യ ഇറങ്ങിയ മത്സരം പക്ഷെ ഇന്ത്യന്‍ ആരാധകരെ നിരാശപ്പെടുത്തുന്നതായിരുന്നു. രോഹിത് ശര്‍മയ്ക്ക് പകരം ഹാര്‍ദ്ദിക് പാണ്ഡ്യ ടീമിന്റെ നായകനായപ്പോള്‍ ലോകകപ്പ് യോഗ്യത പോലും നേടാനാവാതെ പോയ വെസ്റ്റിന്‍ഡീസിനെതിരെയാണ് ഇന്ത്യ തോല്‍വി ഏറ്റുവാങ്ങിയത്.

ലോകകപ്പ് അടുത്തുനില്‍ക്കെ എന്തുകൊണ്ട് സീനിയര്‍ താരങ്ങളായ വിരാട് കോലി,രോഹിത് ശര്‍മ എന്നിവര്‍ക്ക് വിശ്രമം അനുവദിച്ചു എന്നത് വ്യക്തമാക്കിയിരിക്കുകയാണ് രണ്ടാം ഏകദിനത്തില്‍ ഇന്ത്യയുടെ നായകനായ ഹാര്‍ദ്ദിക് പാണ്ഡ്യ. രോഹിത്തും കോലിയും ഇന്ത്യയ്ക്ക് വേണ്ടി നിരന്തരം ക്രിക്കറ്റ് കളിച്ചുകൊണ്ടിരിക്കുന്നു. ചില ചോദ്യങ്ങള്‍ക്ക് ഉത്തരം നല്‍കേണ്ടതുണ്ട്. അതുകൊണ്ടാണ് അവര്‍ക്ക് വിശ്രമം അനുവദിച്ച്ചതെന്നും മൂന്നാം ഏകദിനമത്സരത്തില്‍ രോഹിത് ശര്‍മയും വിരാട് കോലിയും ടീമില്‍ തിരിച്ചെത്തുമെന്നും ഹാര്‍ദ്ദിക് വ്യക്തമാക്കി. മത്സരത്തിന്റെ ടോസ് സമയത്താണ് ഹാര്‍ദ്ദിക് ഇക്കാര്യങ്ങള്‍ പറഞ്ഞത്.