ഒക്ടോബര്‍ 3ന് വനിതാ ടി20 ലോകകപ്പ് ആരംഭിക്കാനിരിക്കെ ഇന്ത്യയുടെ തയ്യാറെടുപ്പുകളില്‍ ആത്മവിശ്വാസം പ്രകടിപ്പിച്ച് ക്യാപ്റ്റന്‍ ഹര്‍മന്‍ പ്രീത് കൗര്‍.കഴിഞ്ഞ കുറച്ച് വര്‍ഷങ്ങളിലായി മികച്ച പ്രകടനം തുടരുമ്പോഴും ഒരു ലോകകിരീടം സ്വന്തമാക്കാന്‍ ഇന്ത്യയ്ക്കായിട്ടില്ല. അതിനാല്‍ തന്നെ ഇത്തവണ ടീം മികച്ച പ്രകടനം കാഴ്ചവെയ്ക്കുമെന്നാണ് ആരാധകരും പ്രതീക്ഷിക്കുന്നത്.
കഴിഞ്ഞ കുറച്ച് വര്‍ഷങ്ങളുടെ കാര്യം കണക്കിലെടുക്കുമ്പോള്‍ ഇന്ത്യയുടേത് മികച്ച നിരയാണെന്നാണ് ക്യാപ്റ്റനായ ഹര്‍മന്‍ പ്രീത് കൗര്‍ പറയുന്നത്. കഴിഞ്ഞ എഡീഷന്‍ ലോകകപ്പുകളെ വെച്ച് നോക്കുമ്പോള്‍ ഇന്ത്യയുടേത് മികച്ച നിരയാണ്. എല്ലാ കോളങ്ങളും നമ്മള്‍ ടിക്കിട്ട് കഴിഞ്ഞു. ലോകകപ്പിന് മുന്‍പായി നടത്തിയ വാര്‍ത്താസമ്മേളനത്തില്‍ ഹര്‍മന്‍ പ്രീത് കൗര്‍ പറയുന്നു.
കഴിഞ്ഞ ഏഷ്യാകപ്പിലും മികച്ച രീതിയിലാണ് ടീം കളിച്ചത്. എന്നാല്‍ ചില മോശം ദിവസങ്ങള്‍ സംഭവിക്കാം. എനിക്കറിയാം ഞാന്‍ ഒരുപാട് ലോകകപ്പുകളായി കളിക്കുന്നു. എന്നാല്‍ പഴയ ആ 19 കാരിയിലുണ്ടായിരുന്ന അതേ ആവേശം 35 വയസിലും എനിക്കുണ്ട്. ഹര്‍മന്‍ പ്രീത് കൗര്‍ പറയുന്നു. നമുക്ക് ഓസ്‌ട്രേലിയയെ എന്നല്ല ഏത് ടീമിനെയും തോല്‍പ്പിക്കാനാകും.ഓസീസിനെ തോല്‍പ്പിക്കാന്‍ കഴിയുന്ന ഏക ടീം ഇന്ത്യയാണെന്ന് അവര്‍ക്കും അറിയാം. ഹര്‍മന്‍ പ്രീത് കൗര്‍ പറയുന്നു.
