ദക്ഷിണാഫ്രിക്കക്കെതിരെ തോൽവി, ലോക ടെസ്റ്റ് ചാമ്പ്യൻഷിപ്പിൽ അഞ്ചാം സ്ഥാനത്തെക്ക് മൂക്കുകുത്തി വീണ് ഇന്ത്യ

ദക്ഷിണാഫ്രിക്കക്കെതിരായ ടെസ്റ്റ് പരമ്പരയിലെ ആദ്യ മത്സരത്തിലേറ്റ കനത്ത പരാജയത്തിന് പിന്നാലെ ടെസ്റ്റ് ചാമ്പ്യന്‍ഷിപ്പ് പോയന്റ് പട്ടികയില്‍ താഴേക്കിറങ്ങി ഇന്ത്യ. മത്സരത്തിന് മുന്‍പ് പട്ടികയില്‍ ഒന്നാം സ്ഥാനത്തുണ്ടായിരുന്ന ഇന്ത്യ അഞ്ചാം സ്ഥാനത്തേക്കാണ് മൂക്കുകുത്തി വീണത്. വിജയശതമാനം അടിസ്ഥാനമാക്കിയാണ് ടെസ്റ്റ് ചാമ്പ്യന്‍ഷിപ്പില്‍ പോയന്റ് നിര്‍ണയിക്കുക എന്നതാണ് ഇന്ത്യയ്ക്ക് തിരിച്ചടിയായത്.

നിലവില്‍ 44.44 ആണ് ടൂര്‍ണമെന്റിലെ ഇന്ത്യയുടെ വിജയശതമാനം. ഇന്ത്യയെ തകര്‍ത്ത് 100 ശതമാനം വിജയവുമായി ദക്ഷിണാഫ്രിക്കയാണ് പട്ടികയില്‍ ഒന്നാം സ്ഥാനത്ത്. പാകിസ്ഥാന്‍ രണ്ടാം സ്ഥാനത്തും ന്യൂസിലന്‍ഡും ബംഗ്ലാദേശും മൂന്നും നാലും സ്ഥാനങ്ങളിലുമാണ്. ദക്ഷിണാഫ്രിക്കക്കെതിരായ ഒന്നാം ക്രിക്കറ്റ് ടെസ്റ്റില്‍ ഇന്നിങ്ങ്‌സിനും 32 റണ്‍സിനുമായിരുന്നു ഇന്ത്യയുടെ തോല്‍വി. ഇതോടെ രണ്ട് മത്സരങ്ങളടങ്ങിയ പരമ്പരയില്‍ ദക്ഷിണാഫ്രിക്ക 1-0ന് മുന്നിലെത്തി.