താരങ്ങൾക്ക് ഫിറ്റ്നസ് ടെസ്റ്റ് പോലുമില്ല, അവരെങ്ങനെ നേരെയാവാനാണ്, ആഞ്ഞടിച്ച് വസീം അക്രം

ലോകകപ്പ് ക്രിക്കറ്റ് മത്സരത്തില്‍ ഇന്ത്യക്കെതിരെ സംഭവിച്ച തോല്‍വിയില്‍ വലിയ വിമര്‍ശനമാണ് പാകിസ്ഥാന്‍ ടീം ഏറ്റുവാങ്ങുന്നത്. ആരാധകര്‍ക്കൊപ്പം മുന്‍ പാക് താരങ്ങളും ടീമിനെതിരെ രൂക്ഷവിമര്‍ശനവുമായി രംഗത്ത് വന്നിരുന്നു. തീര്‍ത്തും പ്രതിരോധാത്മക രീതിയിലാണ് ടീം കളിച്ചതെന്ന് പല താരങ്ങളും അഭിപ്രായപ്പെട്ടിരുന്നു. ഇപ്പോഴിതാ ടീമിന്റെ ഫിറ്റ്‌നസിനെതിരെ വിമര്‍ശനമുയര്‍ത്തിയിരിക്കുകയാണ് പാക് ഇതിഹാസപേസറായ വസീം അക്രം.

എനിക്ക് പാക് താരങ്ങളുടെ ഫിറ്റ്‌നസിനെ പറ്റി ആശങ്കയുണ്ട്. പണ്ട് മിസ്ബ പാകിസ്ഥാന്റെ ഹെഡ് കോച്ചും സെലക്ടറും ആയിരുന്ന സമയത്ത് യോ യോ ടെസ്റ്റ് പോലെയുള്ളവ നിര്‍ബന്ധമായിരുന്നു. ഒരു പ്രഫഷണല്‍ ക്രിക്കറ്റര്‍ മാസത്തില്‍ ഒരിക്കലെങ്കിലും ഇത്തരം ടെസ്റ്റുകളിലൂടെ കടന്നുപോകണം. എന്നാല്‍ ഇപ്പോള്‍ ഈ രീതി തന്നെ പാകിസ്ഥാന്‍ ടീമിനില്ല. കാര്യങ്ങള്‍ അങ്ങനെയാവുമ്പോള്‍ അതിന്റെ ഭവിഷ്യത്തും ടീം അനുഭവിക്കേണ്ടതായി വരും. ഒരു പാകിസ്ഥാന്‍ ടിവി ഷോയ്ക്കിടെ അക്രം പറഞ്ഞു.