ചൂട് സഹിക്കാനാകാതെ പൊതു കിണറ്റിലിറങ്ങി കുളിച്ചു; ദളിത് കുട്ടികളെ നഗ്നരാക്കി നടത്തി മർദ്ദിച്ച് ഉന്നത ജാതിക്കാർ

പൊതു കിണറ്റിൽ ഇറങ്ങി കുളിച്ചതിന് ദളിത് കുട്ടികളെ ഉന്നത ജാതിക്കാർ നഗ്നരാക്കി നടത്തി മർദ്ദിച്ചു. മഹാരാഷ്ട്ര ജാൽഗണിലെ വകാഡി ഗ്രാമത്തിലാണ് സംഭവം ഉണ്ടായത്. ചൂട് സഹിക്കാനാകാത്തതിനെ തുടർന്ന് ഞായറാഴ്ച കുട്ടികൾ കിണറ്റിൽ ഇറങ്ങി കുളിക്കുകയായിരുന്നു. 

കുട്ടികളെ മർദ്ദിക്കുന്നതിന്റെ ദൃശ്യങ്ങൾ സാമൂഹ്യ മാധ്യമങ്ങളിലൂടെ പ്രചരിച്ചിരുന്നു. 12 നും 14 നും മധ്യേ പ്രായമുള്ള കുട്ടികളെയാണ് മർദ്ദിച്ചത്. കുട്ടികൾ കിണറ്റിലിറങ്ങി കുളിച്ചത് അറിഞ്ഞതോടെ ആളുകൾ ഒരുമിച്ചു കൂടുകയും കുട്ടികളെ പിടികൂടുകയുമായിരുന്നു. തുടർന്ന് ഇവരെ നഗ്നരാക്കി നടത്തുകയും മർദ്ദിക്കുകയുമായിരുന്നു. വടികൊണ്ടും ബെൽറ്റ് കൊണ്ടുമാണ് കുട്ടികൾക്ക് മർദ്ദനമേറ്റത്.

സംഭവത്തെ കേന്ദ്ര സാമൂഹിക ക്ഷേമ മന്ത്രി രാംദാസ് അതവാല അപലപിച്ചു. കുട്ടികൾക്കെതിരായ അതിക്രമങ്ങളിൽ കർശന നടപടി സ്വീകരിക്കണം എന്നും അദ്ദേഹം പറഞ്ഞു. അതേസമയം സംഭവത്തിൽ രണ്ട് പേർ അറസ്റ്റിലായിട്ടുണ്ട്.