വീട്ടു ജോലിക്കെത്തിയ പെണ്‍കുട്ടിയെ പീഡിപ്പിക്കാന്‍ ശ്രമം; ബത്തേരി സ്വദേശിയെ നാട്ടുകാര്‍ പിടികൂടി പൊലീസില്‍ ഏല്‍പ്പിച്ചു

വീട്ടുജോലിക്കെത്തിയ പ്രായപൂര്‍ത്തിയാകാത്ത ആദിവാസി പെണ്‍കുട്ടിയ പീഡിപ്പിക്കാന്‍ ശ്രമിച്ച വയോധികന്‍ പിടിയില്‍. സുല്‍ത്താന്‍ബത്തേരി നമ്പിക്കൊല്ലി ടൗണിന് സമീപം പേറാട്ടില്‍ ജോസിനെയാണ് (68) നാട്ടുകാര്‍ പിടികൂടിയത്.

വീട്ടില്‍ ജോലിക്കെത്തിയ തമിഴ്‌നാട് സ്വദേശിനിയായ പെണ്‍കുട്ടിയെ ആണ് ജോസ് പീഡിപ്പിക്കാന്‍ ശ്രമിച്ചത്. തുടര്‍ന്ന് പെണ്‍കുട്ടി വീട്ടില്‍ നിന്നും ഇറങ്ങിയോടി റോഡിലെത്തി. കുട്ടിയുടെ പെരുമാറ്റത്തില്‍ സംശയം തോന്നിയ നാട്ടുകാര്‍ വിവരം അന്വേഷിച്ചപ്പോഴാണ് പീഡനശ്രമം പുറത്തായത്.

നാട്ടുകാര്‍ വിവരമറിയിച്ചതിനെ തുടര്‍ന്ന് പൊലീസും ചൈല്‍ഡ് ലൈന്‍ അധികൃതരും സ്ഥലത്തെത്തി. ഇതിനിടെ രക്ഷപ്പെടാന്‍ ശ്രമിച്ച ജോസിനെ നാട്ടുകാര്‍ തടഞ്ഞു നിര്‍ത്തി. ഇയാള്‍ക്കെതിരെ പെണ്‍കുട്ടിയുടെ അമ്മ ബത്തേരി പൊലീസില്‍ പരാതി നല്‍കി. രണ്ട് ദിവസം മുമ്പാണ് പെണ്‍കുട്ടി ജോസിന്റെ വീട്ടില്‍ ജോലിക്കായെത്തിയത്.