രാജ്യത്തെ ആൾക്കൂട്ട കൊലപാതകങ്ങൾക്ക് ഇനിയും അവസാനമില്ല. ഗുജറാത്തിലെ ദാഹോഡിൽ ആൾക്കൂട്ടം ഇരുപത്തിരണ്ടുകാരനായ അജ്മൽ വഹോനി എന്ന യുവാവിനെ തല്ലിക്കൊന്നു. ശനിയാഴ്ച രാത്രിയിലാണ് സംഭവം നടന്നത്. അജ്മൽ വഹോനിയുടെ സുഹൃത്ത് ഗുരുതരമായി പരിക്കേറ്റ് ആശുപത്രിയിൽ ചികിത്സയിലാണ്.
ദാഹോഡിൽ ഇരുപതോളം പേർ സംഘം ചേർന്നാണ് ഈ യുവാക്കളെ ആക്രമിച്ചത്. മൊബൈൽ ഫോൺ മോഷ്ടാക്കളെന്ന് ആരോപിച്ചാണ് ജനക്കൂട്ടം ഇവരെ ആക്രമിച്ചതെന്ന് പൊലീസ് വ്യക്തമാക്കി.
യുവാക്കളെ ആക്രമിച്ചവർ ഓടി രക്ഷപ്പെട്ടതായി പ്രദേശവാസികൾ പൊലീസിനു മൊഴി നൽകി. സംഭവവുമായി ബന്ധപ്പെട്ട് ഇതുവരെ ആരെയും അറസ്റ്റ് ചെയ്തിട്ടില്ല. പൊലീസ് സംഭവസ്ഥലത്തെത്തുമ്പോൾ അതീവ ഗുരുതരാവസ്ഥയിലായിരുന്നു ഇരുവരും.