ഗൌരി ലങ്കേഷിനേയും കല്‍ബുര്‍ഗിയേയും വധിച്ചത് സമാനമായ തോക്കു കൊണ്ട്?
കല്ബുര്ഗിയും ഗൌരി ലങ്കേഷും കൊലചെയ്യപ്പെട്ടത് ഒരേ രീതിയില്‍
മുതിര്‍ന്ന മാധ്യമ പ്രവര്‍ത്തകയായിരുന്ന ഗൌരി ലങ്കേഷിന്റെ കൊലപാതകം സംബന്ധിച്ച് അന്വേഷണം ശക്തമാക്കിയിരിക്കുകയാണ്. സമാനമായ രീതിയില്‍ ആയിരുന്നു മുന്‍പ് കല്ബുര്ഗിയും കൊലചെയ്യപ്പെട്ടത്. എന്നാല്‍, ഇരുവരുടെയും കൊലപാതകത്തില്‍ മറ്റൊരു സാമ്യത കൂടെയുണ്ട്. ഇരുവരും കൊലചെയ്യപ്പെട്ടത് സമാനമായ തോക്കുപയോഗിച്ചാണെന്ന് റിപ്പോര്‍ട്ടുകള്‍.
പ്രാദേശികമായി നിര്‍മിച്ച 7.65 എംഎം പിസ്റ്റള്‍ ആണ് രണ്ട് കൊലപാതകങ്ങളിലും ഉപയോഗിച്ചിരിക്കുന്നത്. അതേസമയം, ഒരു പ്രത്യേക തോക്കുതന്നെയാണോ ഇരു കൊലപാതകത്തിനും ഉപയോഗിച്ചതെന്ന കാര്യത്തില്‍ വ്യക്തത കൈവന്നിട്ടില്ല.
ഒരേ സംഘം തന്നെയാണ് ഇരു കൊലപാതകത്തിനു പിന്നിലുമുളളതെന്ന സംശയം ബലപ്പെടുത്തുന്നതാണ് കൊലപാതകങ്ങള്‍ തമ്മിലുള്ള സാമ്യമെന്ന് അന്വേഷണ സംഘം വിലയിരുത്തുന്നതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. ഇതിനായി ഗൌരി ലങ്കേഷിന്റെ കൊലപാതകം കല്‍ബുര്‍ഗിയുടെ കേസുമായി ഒത്തുനോക്കാനും സാധ്യതയുണ്ട്.
