നവരസങ്ങള്‍ നിറയുകയാണ് ആ മുഖത്ത് . മിന്നി മറയുന്ന ഭാവങ്ങള്‍ കണ്ടിരിയ്കുമ്പോള്‍ നമ്മുടെ മനസിലും ഭാവങ്ങള്‍ ഉണരുകയാണ് . ഏതൊക്കെയോ നിമിഷങ്ങളിലേയ്ക് ഒരു മൂകനര്‍ത്തകനായി നാം ഓരോരുത്തരും നയിക്കപ്പെടുന്നു.
ഇത് പീസപ്പള്ളി രാജീവ് . 2003 ല്‍ മികച്ച പ്രഫഷണല്‍ നാടക നടനുള്ള അവാര്‍ഡ് നേടിയ കലാകാരന്‍ . അറിയപ്പെടുന്ന ഒരു കഥകളി കലാകാരന്‍ കൂടിയാണ് രാജീവ് .
മൂകനര്‍ത്തകന്‍ എന്ന നാടകത്തിലെ കഥകളി വേഷമാണ് രാജീവിനെ മികച്ച നടനുള്ള അവാര്‍ഡിന് അര്‍ഹനാക്കിയത് . പുരാണത്തിലെ പഞ്ചപാണ്ഡവന്മാരിലൊരാളായ ഭീമന്‍റെ വേഷം കെട്ടിയാടുകയായിരുന്നില്ല ജീവിയ്കുകയായിരുന്നു രാജീവ് എന്നതിന് കാഴ്ച്ചക്കാര്‍ സാക്ഷ്യം .
നാലു വര്‍ഷത്തോളം ഗുരുവായൂരിലെ വിശ്വഭാരതി നാടകസമിതിയുമായി ചേര്‍ന്ന് പ്രവര്‍ത്തിയ്കുന്ന രാജീവിന്‍റെ അഭിനയമികവ് അറിഞ്ഞു ലഭിച്ച വേഷം തന്നെയാണ് മൂകനര്‍ത്തകനിലേത് .
അഭിനയത്തിന് പിന്‍ബലമെങ്കിലും കഥകളി രാജീവിന് ഒരു ദൗത്യം പോലെയാണ് . കലാമണ്ഡലം ഗോപിയിടെ ആരാധകനായിരുന്ന രാജീവിനെ ഗോപിതന്നെയാണ് കഥകളി അഭ്യാസനത്തിനായി അപ്പേട്ടന്‍ എന്നു വിളിയ്കുന്ന രാമന്‍ നമ്പൂതിരിയുടെ അടൂക്കലേയ്ക് അയയ്കുന്നത് . നമ്പൂതിരിയുടെ കീഴില്‍ ചിട്ടയായ പരിശീലനത്തിലൂടെ ഒരു കഥകളി പ്രതിഭ ഉണരുകയായിരുന്നു.
കഥകളി അരങ്ങില്‍ നിന്നും നാടക അരങ്ങിലേയ്ക് ആ പ്രതിഭ വളര്‍ന്നു . ഒട്ടേറെ അമേച്ച്വര്‍ നാടകങ്ങള്‍. പിന്നിട് പ്രഫഷണല്‍ നാടകങ്ങള്‍ . മോഹിനിയാട്ടം എന്ന നാടകമാണ് രാജീവിന് ശരിയ്കും ഒരു ബ്രേയ്ക്കു നല്കിയത് . പിന്നിടങ്ങോട്ട് അവസരങ്ങള്‍ തേടി രാജീവിന് അലയേണ്ടിവന്നിട്ടില്ല .
ഗുരുസാഗരം , കുരൂരമ്മ , സുഭാഷിതം , മായ, താങ്ങ്ബര്‍ഗും നരിപ്പറ്റ രാജുവും ചേര്‍ന്ന് സംവിധാനം ചെയ്ത ദി ടെമ്പെസ്റ്റ് തുടങ്ങി ആ പ്രതിഭ ഏറ്റുവാങ്ങിയ നാടകങ്ങള്‍ നിരവധി . ദി ടെമ്പെസ്റ്റ് കണ്ട പ്രശസ്ത അഭിനേതാവ് ഭരത്ഗോപി രാജീവിന്‍റെ അഭിനയത്തെ ഏറെ പുകഴ്ത്തി . ജീവിതത്തിലെ മറക്കാനാവാത്ത അസുലഭ മുഹൂര്‍ത്തമായി രാജീവ് ആ നിമിഷം ഇന്നും മനസില്‍ സൂക്ഷിയ്കുന്നു .
ത്യശൂര്‍ സ്കൂള്‍ ഓഫ് ഡ്രാമയില്‍നിന്നും പാതിവഴിയില്‍ പഠനം ഉപേക്ഷിച്ചിറങ്ങിയ രാജീവ് കഥകളിയും അഭിനയവും ഏറെ വ്യത്യസ്തമാണെന്ന് പറയുന്നു. കഥകളിയില്‍ വ്യവസ്ഥാപിതമായ ചട്ടക്കൂടിനുള്ളില്‍ നിന്നാണ് അവതരണം . എന്നാല്‍ നാടകത്തില്‍ അങ്ങനെയല്ല കഥാപാത്രങ്ങളുടെ വ്യത്യസ്ത സ്വഭാവങ്ങള്‍ക്കും സന്ദര്‍ഭങ്ങള്‍ക്കും അനുസരിച്ച് അഭിനയിയ്ക്കണം . അല്ലെങ്കില്‍ കാഴ്ച്ചക്കാര്‍ കൂവും .
അഭിനയത്തിന്‍റെ പുതിയ കവാടങ്ങല്‍ തേടുമ്പോഴും കഥകളിയെ രാജീവ് മറക്കുന്നില്ല .എല്ലാ വര്‍ഷവും കോളേജുകളിലും സ്കൂളുകളിലും കുട്ടികളില്‍ കഥകളിയിലുള്ള താല്‍പര്യം വളര്‍ത്താന്‍ ക്ളാസുകളും അവതരണവും രാജീവ് നടത്താറുണ്ട് . കഥകളി പഠനത്തിന്‍ കേന്ദ്ര സംസ്കാരിക വകുപ്പിന്‍റെ സ്കോളര്‍ഷിപ്പ് രാജീവിന് ലഭിയ്കുന്നുണ്ട് .
പുതുമയുള്ള ഒട്ടേറെ വേഷങ്ങളാണ് സംസ്ഥാന അവാര്‍ഡ് ലഭിച്ചതോടെ രാജീവിനെത്തേടി എത്തിക്കൊണ്ടിരിയ്കുന്നത് .
