സുന്ദരമായ നീണ്ട നഖങ്ങള്‍ ആഗ്രഹിക്കാത്തവര്‍ ആരുണ്ട് !

നെയില്‍ പോളീഷ് പുരട്ടി ഭംഗിയാക്കിയ നീണ്ട നഖങ്ങള്‍ യുവതികളുടെ സൌന്ദര്യ സ്വപ്‌നങ്ങളില്‍ ഒന്നാണ്. എന്നാല്‍ ചിലര്‍ക്ക് തങ്ങളുടെ നഖത്തിന് അത്തരത്തിലുള്ള ഭംഗി നല്‍കാന്‍ കഴിയാറില്ല. പലര്‍ക്കും നഖം നീട്ടി വളര്‍ത്തണമെന്നുണ്ടെങ്കിലും പൊട്ടിപ്പോകുന്നതിനാല്‍ അതിന് സാധിക്കാറുമില്ല. എങ്ങനെയാണ് നഖം സംരക്ഷിക്കുക?

നഖം ആരോഗ്യത്തിന്‍റെ സൂചകം കൂടിയാണ്. അല്‍പ്പം ഒന്നു ശ്രദ്ധിച്ചാല്‍ സ്വപ്നത്തിലെ സുന്ദര നഖം നിങ്ങള്‍ക്കും സ്വന്തമാക്കാം. അതിന് നഖം എപ്പോഴും നനഞ്ഞിരിക്കാന്‍ അനുവദിക്കാതിരിക്കുക എന്നതാണ് പ്രാഥമികമായി ചെയ്യേണ്ടത്. വീട്ടു ജോലികള്‍ക്കിടെ ഇതെങ്ങനെയെന്ന് നിങ്ങള്‍ ചോദിച്ചേക്കാം.

അതിനുമുണ്ട് പരിഹാരം. നഖം എപ്പോഴും നനയുന്നു എങ്കില്‍ സോപ്പുകളും ഡിറ്റര്‍ജന്‍റുകളും അധികം പുരളാതിരിക്കാനും ഉപയോഗം കഴിഞ്ഞാല്‍ നഖത്തിന്‍റെ പിറകില്‍ പറ്റിപ്പിടിച്ചിരിക്കാതിരിക്കാനും ശ്രദ്ധിക്കുക എന്നത് പ്രധാനമാണ്. അടുത്ത പടിയായി ഉറങ്ങുംമുന്‍പ് നെയില്‍ മോയിസ്‌ചറൈസര്‍ പുരട്ടുക എന്നതാണ്. ഇത് നഖത്തിന് കൂടുതല്‍ ആരോഗ്യം നല്‍കാന്‍ സഹായിക്കുക മാത്രമല്ല തിളക്കവും നല്‍കും.

നെയില്‍ പോളിഷ് റിമൂവറുകള്‍ എപ്പോഴുമെപ്പോഴും ഉപയോഗിക്കുന്നത് കഴിവതും ഒഴിവാക്കണം. കാരണം ഇതില്‍ ഉപയോഗിക്കുന്ന രാസവസ്തുക്കള്‍ നഖത്തിന്‍റെ ആരോഗ്യത്തെ ഹാനികരമായി ബാധിക്കാനിടയുണ്ട്. നെയില്‍ പോളിഷ് ഇടും മുന്‍പ് നെയില്‍ ഹാര്‍ഡ്‌നര്‍ ബേസ് കോട്ടായി ഇടുന്നതും നല്ലതാണ്.

വൈറ്റമിന്‍ ബികോംപ്ളക്സ് സപ്ളിമെന്‍റുകള്‍ കുറച്ചുകാലത്തേക്ക് കഴിക്കുന്നത് നഖത്തിന്‍റെ ആരോഗ്യം വര്‍ദ്ധിക്കാന്‍ സഹായിക്കും. അല്ലെങ്കില്‍ യീസ്റ്റ് അടങ്ങിയ ഭക്ഷണം, ധാന്യങ്ങള്‍, നട്‌സ്, മുട്ടയുടെ മഞ്ഞ, മത്തി, ലിവര്‍, കോളിഫ്ലവര്‍, പഴം , കൂണ്‍വിഭവങ്ങള്‍ എന്നിവ ഭക്ഷണത്തിലുള്‍പ്പെടുത്തിയാലും മതി. ഇത്രയും കാര്യങ്ങള്‍ ഒന്നു പാലിച്ചു നോക്കൂ. മനോഹരങ്ങളായ നഖങ്ങള്‍ വേണമെന്നുണ്ടെങ്കില്‍ മാത്രം.