ഇന്ത്യന്‍ സിനിമയുടെ ലെവലിലേക്ക് ഉയര്‍ന്നിരിക്കുകയാണ് മലയാള സിനിമ. ഭാഷയുടെ അതിര്‍വരമ്പുകള്‍ മറികടന്നു മലയാള സിനിമ കുതിക്കുകയാണ്. അണിയറയില്‍ ഒരുങ്ങുന്നതെല്ലാം വമ്പന്‍ ചിത്രങ്ങള്‍. മോഹൻലാൽ, പ്രിത്വി രാജ്, മമ്മൂട്ടി എന്നിവരാണ് വമ്പൻ ചിത്രങ്ങളുമായി കളത്തിലിറങ്ങാന്‍ പോകുന്നത്.
മോഹന്‍ലാലിന്റെ മഹാഭാരതം, ഒടിയന്‍, ലൂസിഫര്‍. മമ്മൂട്ടിയുടെ കുഞ്ഞാലിമരയ്ക്കാര്‍, കര്‍ണന്‍. പൃഥ്വിരാജിന്റെ കര്‍ണന്‍, ആട് ജീവിതം തുടങ്ങിയ വമ്പൻ ചിത്രങ്ങളിലൂടെ പ്രിത്വിയും മോഹൻലാലും മമ്മൂട്ടിയും പുത്തനൊരു ലോകമാണ് മലയാള സിനിമയ്ക്ക് മുന്നില്‍ തുറന്നിടുന്നത്.
ഇവർക്കൊപ്പം നിവിൻ പോളിയും ദുല്‍ഖര്‍ സല്‍മാനും ടോവിനോ തോമസും വലിയ പ്രൊജെക്ടുകളുമായി മുന്നോട്ട് തന്നെ നീങ്ങുകയാണ്. എന്നാൽ ഒടിയനേയും കര്‍ണനേയും വെല്ലുന്ന മറ്റൊരു വമ്പന്‍ സിനിമ മലയാളത്തില്‍ ഒരുങ്ങുന്നുവെന്ന് റിപ്പോര്‍ട്ടുകള്‍. 33 ഭാഷകളിൽ ആയി ഒരുക്കാൻ പ്ലാൻ ചെയ്യുന്ന ഈ ചിത്രം സംവിധാനം ചെയ്യുന്നത് ഐ വി ശശി ആണ്.
കുവൈറ്റ് യുദ്ധം പ്രമേയമാക്കി ഒരു ബ്രഹ്മാണ്ഡ ചിത്രവുമായിട്ടാണ് ഐ വി ശശി തന്റെ വമ്പൻ തിരിച്ചു വരവിനു തയ്യാറെടുക്കുന്നത്. ബേണിങ് വെൽസ് എന്നാണ് ഈ ചിത്രത്തിന് ഇട്ടിരിക്കുന്ന പേര്. ഇന്ത്യൻ സിനിമയിൽ തന്നെ ഏറ്റവും അധികം ചിത്രങ്ങൾ ഒരുക്കിയിട്ടുള്ള സംവിധായകരിൽ ഒരാളാണ് ഐ വി ശശി. ചിത്രത്തെ കുറിച്ചുള്ള കൂടുതല്‍ വിവരങ്ങള്‍ ഇതുവരെ പുറത്തുവിട്ടിട്ടില്ല.