ശ്രീനിഷ് എന്റെ കാമുകനല്ല, പേളിയും ശ്രീനിയും വിവാഹം കഴിച്ചാൽ എനിക്കെന്താ? - അർച്ചന ചോദിക്കുന്നു
''ഞാന്‍ പേളിയുടെ വിവാഹവാര്‍ത്ത അറിഞ്ഞ് തലകറങ്ങി ബോധം കെട്ടുവീണിട്ടില്ല''
ബിഗ് ബോസിലൂടെയാണ് പേളി മാണിയും ശ്രീനിഷ് അരവിന്ദും പരിചയപ്പെടുന്നതും അടുക്കുന്നതും ഒടുവിൽ വിവാഹ നിശ്ചയത്തിലേക്ക് വരെ എത്തിയതും. ബിഗ് ബോസിനകത്ത് വെച്ചും പുറത്തുവെച്ചും ഇരുവരുടെയും ബന്ധം വെറും ഡ്രാമ കളിയാണെന്നും ഗെയിം പ്ലാൻ ആണെന്നും പലരും പറഞ്ഞിരുന്നു. അക്കൂട്ടത്തിൽ ബിഗ് ബോസ് അംഗമായ അർച്ചന സുശീലനുമുണ്ടായിരുന്നു.
ഇപ്പോഴിതാ, ‘പേളിഷ്’ വിവാഹത്തിനു പ്രതികരണം അറിയിച്ചിരിക്കുകയാണ് അർച്ചന. ഇരുവരുടെയും വിവാഹനിശ്ചയം കഴിഞ്ഞുവെന്നതറിഞ്ഞ് താന്‍ എവിടെയും തലകറങ്ങി ബോധരഹിതയായി വീണിട്ടില്ലെന്ന് അർച്ചന പറയുന്നു. പേളിയുടെ വിവാഹവാര്‍ത്ത അറിഞ്ഞ അര്‍ച്ചന ബോധം കെട്ടുവെന്ന് സാമൂഹിക മാധ്യമങ്ങളില്‍ ചിലര്‍ പ്രചരിപ്പിച്ചിരുന്നു. അതിന് മറുപടിയെന്നോണമാണ് അർച്ചന പുതിയ വീഡിയോ പോസ്റ്റ് ചെയ്തിരിക്കുന്നത്.
പേളിയും ശ്രീനിഷും വിവാഹം കഴിക്കുന്നതില്‍ എനിക്ക് സന്തോഷമേയുള്ളൂ. പേളിയുടെയും ശ്രീനിഷിന്റെയും വിവാഹത്തിന് കുടുംബാംഗങ്ങളുടെ പിന്തുണയുണ്ട്. ബോധം കെട്ട് വീഴാൻ ഞാൻ ശ്രീനിഷിന്റെ കാമുകി ഒന്നുമല്ലല്ലോ? പേളിയുടെയും ശ്രീനിഷിന്റെയും ആരാധകരാണ് എന്ന് പറഞ്ഞ് ഇത്തരത്തിലുള്ള കാര്യങ്ങള്‍ പടച്ചു വിടുമ്പോള്‍ ബാധിക്കുന്നത് അവരുടെ പ്രതിച്ഛായയാണ്. - അർച്ചന പറയുന്നു.
