മലയാളത്തിലെ മഹാനടന്‍‌മാരായ മമ്മൂട്ടിക്കും മോഹന്‍ലാലിനും വില്ലന്‍‌മാരെ കിട്ടാന്‍ പാടാണ്. അത് അവര്‍ തന്നെയാണ് മലയാളത്തിലെ ഏറ്റവും മികച്ച ആക്‍ടിംഗ് പവ്വര്‍ഹൌസുകള്‍ എന്നതുകൊണ്ട് കൂടിയാണ്. അവര്‍ക്കെതിരെ വില്ലനായി വരുന്നവരും മികച്ച അഭിനേതാക്കളല്ലെങ്കില്‍ സിനിമ മൊത്തത്തില്‍ പാളുമെന്നുറപ്പ്.
ദി ഗ്രേറ്റ്ഫാദര്‍ എന്ന ചിത്രത്തില്‍ മമ്മൂട്ടിയുടെ എതിര്‍ചേരിയില്‍ നിലയുറപ്പിച്ചവരില്‍ ഒരാള്‍ തമിഴ് താരം ആര്യ ആയിരുന്നു. ഗംഭീര പെര്‍ഫോമന്‍സാണ് ആര്യ പുറത്തെടുത്തത്. മമ്മൂട്ടിക്കൊപ്പം ചിത്രത്തിന്‍റെ ത്രില്ലര്‍ മൂഡിനെ നിലനിര്‍ത്തുന്നതില്‍ ആര്യ വഹിച്ച പങ്ക് വലുതായിരുന്നു.
ഇപ്പോഴിതാ, ആര്യ മഹാനടന്‍ മോഹന്‍ലാലിനും വില്ലനാകുകയാണ്. കെ വി ആനന്ദ് സംവിധാനം ചെയ്യുന്ന മോഹന്‍ലാല്‍ - സൂര്യ ടീമിന്‍റെ തമിഴ് ചിത്രത്തിലാണ് ആര്യ വില്ലനായി എത്തുന്നത്. ലൈക പ്രൊഡക്ഷന്‍സ് നിര്‍മ്മിക്കുന്ന സിനിമ ഇപ്പോള്‍ ലണ്ടനില്‍ ചിത്രീകരിച്ചുകൊണ്ടിരിക്കുകയാണ്.
അല്ലു ശിരിഷ്, സയേഷ, ബൊമന്‍ ഇറാനി, സമുദ്രക്കനി തുടങ്ങിയ വമ്പന്‍ താരനിരയാണ് ഈ സിനിമയിലുള്ളത്. 10 രാജ്യങ്ങളിലായാണ് ഈ സിനിമ ചിത്രീകരിക്കുന്നത്. ലണ്ടന്‍ കൂടാതെ ബ്രസീല്‍, ന്യൂയോര്‍ക്ക് എന്നിവിടങ്ങള്‍ പ്രധാന ലൊക്കേഷനുകളായിരിക്കും. ഇന്ത്യയില്‍ ഹൈദരാബാദിലും ഡല്‍ഹിയിലും ചിത്രീകരണമുണ്ട്.
ഹാരിസ് ജയരാജ് സംഗീതം നിര്‍വഹിക്കുന്ന സിനിമയുടെ ക്യാമറ ചലിപ്പിക്കുന്നത് ഗാവമിക് യു ആരി ആണ്.