ദുല്‍ഖര്‍ സല്‍മാന്‍ ! സമീപകാലത്ത് മലയാളത്തില്‍ നിന്ന് പാന്‍ ഇന്ത്യയില്‍ ഇത്രത്തോളം ചര്‍ച്ച ചെയ്യപ്പെട്ട മറ്റൊരു പേരില്ല. മമ്മൂട്ടിക്കും മോഹന്‍ലാലിനും ശേഷം തന്റെ താരമൂല്യം പാന്‍ ഇന്ത്യന്‍ തലത്തില്‍ വിറ്റഴിക്കുകയാണ് ദുല്‍ഖര്‍. ഇപ്പോള്‍ ഇതാ ആര്‍.ബാല്‍ക്കി സംവിധാനം ചെയ്ത ചുപ്പിലൂടെ ബോളിവുഡില്‍ തന്റെ അപ്രമാദിത്തം അരക്കിട്ടുറപ്പിക്കുകയാണ് ദുല്‍ഖര്‍.
സിനിമയെന്ന മായികലോകത്ത് ജീവിക്കുന്ന, അതിലൂടെ മാത്രം ചിന്തിക്കുന്ന സൈക്കോപാത്ത് കഥാപാത്രമായി ദുല്‍ഖര്‍ സല്‍മാന്‍ ഞെട്ടിക്കുന്ന പ്രകടനമാണ് നടത്തിയിരിക്കുന്നത്. ഒറ്റവാക്കില്‍ പറഞ്ഞാല്‍ ദുല്‍ഖറിന്റെ കരിയര്‍ ബെസ്റ്റ് പെര്‍ഫോമന്‍സ് ! നിമിഷ നേരം കൊണ്ട് വികാരങ്ങള്‍ മാറിമറയുന്ന സൈക്കോപാത്തിനെ ദുല്‍ഖര്‍ തന്റെ കൈയില്‍ ഭദ്രമാക്കി. ഡാനി (സോളമന്‍ ഗോമസ്) എന്ന കഥാപാത്രമായി ദുല്‍ഖര്‍ ചുപ്പില്‍ നിറഞ്ഞാടിയിരിക്കുകയാണ്. താരമായി മാത്രമല്ല മികച്ചൊരു അഭിനേതാവ് എന്ന നിലയിലും ദുല്‍ഖര്‍ സ്വയം പുതുക്കിയിരിക്കുന്നു. ഉന്മാദിയാകുന്ന രംഗങ്ങളെല്ലാം കയ്യടക്കത്തോടെയും സ്വയം നിയന്ത്രിച്ചും ദുല്‍ഖര്‍ മികച്ചതാക്കി. ക്ലൈമാക്‌സില്‍ ദുല്‍ഖറിന്റെ ഒറ്റയാള്‍ പ്രകടനമാണ് സിനിമയെ ചുമലിലേറ്റുന്നത്.
സൈക്കോപാത്തായ സീരിയല്‍ കില്ലറിലേക്ക് മുംബൈ ക്രൈം ബ്രാഞ്ച് ഉദ്യോഗസ്ഥന്‍ അരവിന്ദിന്റെ നേതൃത്വത്തില്‍ പഴുതടച്ച അന്വേഷണമാണ് നടത്തുന്നത്. എന്നാല്‍ ആര്‍ക്കും പിടികൊടുക്കാതെ ഈ സീരിയല്‍ കില്ലര്‍ ഓരോ കൊലപാതകങ്ങളായി പൂര്‍ത്തിയാക്കുന്നു. ഒടുവില്‍ ഈ കില്ലറെ പൂട്ടാന്‍ ഇരയെ നല്‍കി കാത്തിരിക്കുകയാണ് അന്വേഷണസംഘം. അവിടെയും അന്വേഷണസംഘത്തിന്റെ കണക്കുകൂട്ടലുകളെ തെറ്റിക്കുന്നുണ്ട് കില്ലര്‍. ഒടുവില്‍ കില്ലറിന്റെ ഭൂതകാലത്തെ കുറിച്ച് അറിയുന്നിടത്ത് അയാള്‍ എങ്ങനെ ഇത്ര ക്രൂരനായി എന്ന് വ്യക്തമാക്കുന്നു. ഇതാണ് ചുപ്പ് എന്ന സിനിമയുടെ ഇതിവൃത്തം.