സീതാരാമത്തിന് വെറും 2 കോടിക്ക് നഷ്ടമായ 100 കോടി 'ലക്കി'യിലൂടെ സ്വന്തമാക്കാൻ ദുൽഖർ സൽമാൻ: ഇതുവരെയുള്ള കളക്ഷൻ റിപ്പോർട്ട് പുറത്ത്

ദുൽഖർ സൽമാന്റെ കരിയറിലെ ആദ്യത്തെ 100 കോടിക്ക് ഇനി അധികം തുകയില്ല. വെങ്കി അടലൂരി സംവിധാനം ചെയ്ത ലക്കി ഭാസ്കർ ഇതുവരെ നേടിയ കളക്ഷൻ റിപ്പോർട്ട് പുറത്ത്. 11 ദിവസം കൊണ്ട് ചിത്രം 96 കോടിയാണ് സ്വന്തമാക്കിയത്. ഇനി വെറും 4 കോടിയാണ് 100 കോടി എന്ന മാജിക് നമ്പറിലേക്ക് എത്താൻ. ഇന്നലത്തെ കളക്ഷൻ കൂടി ആകുമ്പോൾ ചിത്രം 100 കോടി നേടിയിട്ടുണ്ടാകുമെന്നാണ് വിലയിരുത്തൽ. 

7 ദിവസം കഴിഞ്ഞപ്പോൾ ചിത്രം ബോക്സ് ഓഫീസിൽ നിന്നും നേടിയത് ഏകദേശം 70 കോടി ആയിരുന്നു. നാല് ദിവസം കൊണ്ട് 55 കോടി ലക്കി ഭാസ്കർ നേടിയിരുന്നു. തെലുങ്കിൽ വൻ സ്വീകരണമാണ് ചിത്രത്തിന് ലഭിക്കുന്നത്. സ്ഥിരം തെലുങ്ക് മസാല ചേരുവകൾ ഒന്നുമില്ലാതെ തന്നെ, ഭാസ്കർ എന്ന സാധാരണക്കാരനായി ദുൽഖർ നിറഞ്ഞാടിയ ചിത്രത്തിന് ഓരോ ദിവസവും കൂടുതൽ ഷോകളാണ് ആഡ് ചെയ്യുന്നത്.

തെലുങ്കില്‍ വീണ്ടും നായകനായ ദുല്‍ഖറിന്റെ ചിത്രം ഭാഷാഭേദമന്യേ ശ്രദ്ധയാകര്‍ഷിക്കുകയാണ്. ദുല്‍ഖറിന് യോജിക്കുന്ന ഒരു കഥാപാത്രമാണ ചിത്രത്തിലേത് എന്നാണ് അഭിപ്രായങ്ങള്‍. ദുല്‍ഖറിന്റെ പ്രകടനം സിനിമയുടെ ആകര്‍ഷണവുമാകുന്നു. അന്യഭാഷയില്‍ മലയാളി താരം നേടുന്ന കളക്ഷൻ ദുല്‍ഖറിന്റെ സ്വീകാര്യതയും വ്യക്തമാക്കുന്നതാണെന്നാണ് അഭിപ്രായങ്ങള്‍. വെങ്കി അറ്റ്ലൂരി തിരക്കഥ എഴുതി സംവിധാനം ചെയ്ത ചിത്രത്തിലൂടെ ദുൽഖർ തെലുങ്കിൽ തന്റെ സാന്നിധ്യം ഉറപ്പിക്കുകയാണ്.