ഭരണഘടനയുടെ ആമുഖം പങ്കുവെച്ചു; നടി പാര്‍വതി തിരുവോത്തിനെതിരെ സൈബര്‍ ആക്രമണവുമായി തീവ്ര ഹിന്ദുത്വവാദികള്‍

ഹിന്ദു വിശ്വാസികളെ പ്രകോപിപ്പിക്കാനും സമൂഹത്തില്‍ സ്പര്‍ദ്ധയുണ്ടാക്കാനുമാണ് പാര്‍വതി ശ്രമിക്കുന്നതെന്ന് നിരവധി പേര്‍ ആരോപിച്ചു

Parvathy Thiruvothu

അയോധ്യയിലെ രാമക്ഷേത്ര പ്രാണപ്രതിഷ്ഠയുടെ പശ്ചാത്തലത്തില്‍ ഇന്ത്യന്‍ ഭരണഘടനയുടെ ആമുഖം ഇന്‍സ്റ്റഗ്രാമില്‍ പങ്കുവെച്ച നടി പാര്‍വതി തിരുവോത്തിനെതിരെ സൈബര്‍ ആക്രമണം. 'നമ്മുടെ ഇന്ത്യ' എന്ന ക്യാപ്ഷനോടെയാണ് താരം ഇന്ത്യന്‍ ഭരണഘടനയുടെ ആമുഖം പങ്കുവെച്ചത്. ഇതിനു പിന്നാലെ തീവ്ര ഹിന്ദുത്വ ഹാന്‍ഡിലുകളും സംഘപരിവാര്‍ ഹാന്‍ഡിലുകളും താരത്തിനെതിരെ രംഗത്തെത്തി. 

ഹിന്ദു വിശ്വാസികളെ പ്രകോപിപ്പിക്കാനും സമൂഹത്തില്‍ സ്പര്‍ദ്ധയുണ്ടാക്കാനുമാണ് പാര്‍വതി ശ്രമിക്കുന്നതെന്ന് നിരവധി പേര്‍ ആരോപിച്ചു. അതേസമയം താരത്തിന്റെ രാഷ്ട്രീയ നിലപാടിനെ പിന്തുണച്ചും നിരവധി പേര്‍ രംഗത്തെത്തിയിട്ടുണ്ട്. മതേതര രാജ്യമായ ഇന്ത്യയിലെ പ്രധാനമന്ത്രി ഒരു ക്ഷേത്രത്തിന്റെ ഉദ്ഘാടന ചടങ്ങിനു നേതൃത്വം നല്‍കിയത് തെറ്റായ നടപടിയാണെന്ന് പല കോണുകളില്‍ നിന്നും വിമര്‍ശനം ഉയര്‍ന്നിരുന്നു. 

View this post on Instagram

A post shared by Parvathy Thiruvothu (@par_vathy)

അതേസമയം അയോധ്യയിലെ രാമക്ഷേത്രത്തിന്റെ പ്രാണപ്രതിഷ്ഠാ ചടങ്ങുകള്‍ പൂര്‍ത്തിയായി. രാംലല്ല വിഗ്രഹത്തിന്റെ കണ്ണു മൂടിക്കെട്ടിയ തുണി അഴിച്ചുമാറ്റിയതോടെയാണ് പ്രതിഷ്ഠാ ചടങ്ങുകള്‍ പൂര്‍ണമായത്. 'മുഖ്യ യജമാനന്‍' ആയ പ്രധാനമന്ത്രി നരേന്ദ്ര മോദിയാണ് ചടങ്ങുകള്‍ക്ക് നേതൃത്വം നല്‍കിയത്. ആര്‍എസ്എസ് മേധാവി മോഹന്‍ ഭാഗവത്, ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്, ഉത്തര്‍പ്രദേശ് ഗവര്‍ണര്‍ ആനന്ദിബെന്‍ പട്ടേല്‍ തുടങ്ങിയവരും പ്രധാനമന്ത്രിക്കൊപ്പം പ്രധാന ചടങ്ങുകളില്‍ പങ്കെടുത്തു. കാശിയിലെ വേദപണ്ഡിതന്‍ ലക്ഷ്മികാന്ത് ദീക്ഷിത് ആയിരുന്നു മുഖ്യ പുരോഹിതന്‍.