ഷൈൻ ടോമിൻ്റെ ആ വാക്കുകൾ എന്നെ വേദനിപ്പിച്ചു, പ്രതികരണവുമായി സംയുക്ത

മലയാളി പ്രേക്ഷകരുടെ പ്രിയ താരമാണ് നടി സംയുക്ത. തീവണ്ടിയിലൂടെ ആരാധകരുടെ മനസ്സ് സ്വന്തമാക്കിയ താരം നിലവിൽ തമിഴ്,തെലുങ്ക് ചിത്രങ്ങളിൽ സജീവമാണ്. താരത്തിൻ്റെ ഏറ്റവും പുതിയ ചിത്രമായ വീരുപാക്ഷ മികച്ച വിജയമാണ് തെലുങ്കിൽ സ്വന്തമാക്കിയിരിക്കുന്നത്. ഈ ചിത്രം ഉടൻ തന്നെ മലയാളത്തിലും റിലീസ് ചെയ്യുന്നുണ്ട്. ഇതിൻ്റെ പ്രമോഷനെത്തിയ താരം ബൂമറാംഗ് എന്ന തൻ്റെ മലയാള സിനിമയുമായി ബന്ധപ്പെട്ടുണ്ടായ വിവാദത്തിൽ പ്രതികരിച്ചിരിക്കുകയാണ് ഇപ്പോൾ.

ബൂമറാംഗ് എന്ന മലയാള സിനിമയുടെ പ്രമോഷൻ സമയത്ത് താരവുമായി സിനിമയുടെ അണിയറപ്രവർത്തകർ ബന്ധപ്പെട്ടെങ്കിലും ആ സമയത്ത് പ്രമോഷൻ പരിപാടികളിൽ പങ്കെടുക്കാൻ താരം വിസമ്മതിച്ചെന്ന് സിനിമയുടെ നിർമാതാവ് വ്യക്തമാക്കിയിരുന്നു. വിഷയത്തിൽ നടൻ ഷൈൻ ടോം ചാക്കോയും പ്രതികരിച്ചിരുന്നു. മേനോൻ ആയാലും നായരായാലും ചെയ്ത ജോലി ചെയ്യാതെ പോയിട്ടെന്ത് കാര്യമെന്നും ഷൈൻ ടോം പറഞ്ഞിരുന്നു. ഷൈൻ പറഞ്ഞ കാര്യത്തിൽ തനിക്ക് സങ്കടം തോന്നിയെന്നും പ്രോഗ്രസീവായി എടുത്ത തീരുമാനമാണ് പേരിനൊപ്പം ജാതിവാൽ വേണ്ട എന്നതെന്നും സംയുക്ത പറഞ്ഞു.

തൻ്റെ ആ തീരുമാനത്തെ ചോദ്യം ചെയ്യപ്പെട്ടപ്പോൾ അത് സങ്കടപ്പെടുത്തിയെന്നും ബൂമറാംഗുമായി ബന്ധപ്പെട്ട വിഷയം മറ്റൊന്നായിരുന്നുവെന്നും എന്നാൽ അതിനെ പറ്റി സംസാരിക്കവെ ഷൈൻ ഞാനെടുത്ത തീരുമാനവുമായി കാര്യങ്ങൾ കൂട്ടിയിണക്കി പറഞ്ഞ കാര്യങ്ങൾ കേട്ടപ്പോൾ സങ്കടം തോന്നിയെന്ന് സംയുക്ത വാർത്ത സമ്മേളനത്തിൽ പറഞ്ഞു.