ഗോപി സുന്ദറിന്റെ പുതിയ ഗാനം തമിഴ് പാട്ടിന്റെ കോപ്പിയടി? ഗോപി വീണ്ടും വിവാദത്തിൽ

ഗോപി സുന്ദർ വീണ്ടും വിവാദത്തിൽ

വിവാദങ്ങൾ എപ്പോഴും ഗോപി സുന്ദറിന്റെ പിന്നാലെയുണ്ട്. സംഗീത സംവിധാനം ഗോപി സുന്ദർ ആണോ സാമ്യമുള്ള ഗാനവും തേടി സോഷ്യൽ മീഡിയ യാത്ര ചെയ്തിരിക്കും. ഏതായാലും ഒരിക്കൽ കൂടി കോപ്പിയടി വിവാദത്തിൽ പെട്ടിരിയ്ക്കുകയാണ് ഗോപി സുന്ദർ.

അന്തരിച്ച സംവിധായകൻ ദീപന്റെ അവസാന ചിത്രമായ സത്യയിലെ പുതിയ ഗാനം തമിഴ് പാട്ടുമായി സാമ്യമുണ്ടെന്ന് ആരാധകർ പറയുന്നു. ഗോപി സുന്ദർ ഈണമിട്ട 'ഞാൻ നിന്നെ തേടി വരും' എന്ന ഗാനത്തിന്  വിക്രം നായകനായ തമിഴ് ചിത്രം ഇരു മുഗനിലെ 'ഹെലേന' എന്ന ഗാനത്തിനോട് സാമ്യമുണ്ടെന്നാണ് പ്രേക്ഷകരുടെ വാദം. 

യുട്യൂബിലുള്ള പാട്ടിനു താഴെ വന്ന കമന്റുകളിൽ ഭൂരിപക്ഷവും ചൂണ്ടിക്കാണിക്കുന്നതും ഇതു തന്നെ. ബി കെ .ഹരിനാരായണനാണ് ഈ പാട്ടിന്റെ വരികൾ എഴുതിയിരിക്കുന്നത്. ആലപിച്ചിരിക്കുന്നത് അഭയ ഹിരൺമയി ആണ്. ജയറാം നായകനാകുന്ന ചിത്രത്തിലെ ഗാനത്തെ ട്രോളി കൊല്ലുകയാണ് ആരാധകർ.

രഞ്ജിത്തിന്റെ ലീല എന്ന ചിത്രത്തിലൂടെ ശ്രദ്ധേയായ പാർവ്വതിയാണ് ചിത്രത്തിലെ നായിക. ലീലയിൽ നിന്നു വ്യത്യസ്തമായി മോഡേൺ ലുക്കിലെത്തുന്ന പാർവ്വതിയും സാൾട്ട് ആൻഡ് പെപ്പർ ലുക്കിൽ ജയറാമും ആടിപ്പാടുന്ന പ്രണയ ഗാനം ഇതിനോടകം കുപ്രസിദ്ധി നേടിക്കഴിഞ്ഞു.