കുഞ്ഞാലിമരയ്ക്കാര്‍ വിവാദം കത്തിപ്പടരുകയാണ്. ഈ സബ്ജക്ടില്‍ ആരാദ്യം സിനിമ ചെയ്യും എന്ന തര്‍ക്കത്തിന് പുതിയ മാനം കൈവരിച്ചിരിക്കുന്നത് പ്രിയദര്‍ശന്‍റെ വെളിപ്പെടുത്തലോടെയാണ്. എട്ടുമാസത്തിനുള്ളില്‍ മമ്മൂട്ടി - സന്തോഷ് ശിവന് ടീം കുഞ്ഞാലിമരയ്ക്കാര്‍ ആരംഭിച്ചില്ലെങ്കില്‍ താനും മോഹന്‍ലാലും ആ വിഷയത്തില്‍ സിനിമ ചെയ്യുമെന്നാണ് പ്രിയദര്‍ശന്‍ അറിയിച്ചിരിക്കുന്നത്.
പ്രിയദര്‍ശന്‍ ഈ വിഷയത്തില്‍ സിനിമ ചെയ്യാനായി വര്‍ഷങ്ങളായി ഗവേഷണത്തിലാണ്. മുമ്പൊരിക്കല്‍ ഇക്കാര്യം പുറത്തുവിടാനൊരുങ്ങിയപ്പോഴാണ് മമ്മൂട്ടി - സന്തോഷ് ശിവന് ടീം ആ വിഷയം സിനിമയാക്കുന്നു എന്നറിഞ്ഞത്. എന്നാല്‍ ആ പ്രൊജക്ട് നടന്നില്ല.
ഇപ്പോള്‍ വീണ്ടും പ്രിയദര്‍ശന്‍ മോഹന്‍ലാലിനെ നായകനാക്കി ആ പ്രൊജക്ട് ആലോചിച്ചപ്പോഴാണ് ആഗസ്റ്റ് സിനിമാസ് ഔദ്യോഗികമായി മമ്മൂട്ടിയുടെ സിനിമ പ്രഖ്യാപിച്ചിരിക്കുന്നത്. ഇനിയൊരു എട്ടുമാസം കൂടി കാത്തിരിക്കുമെന്നാണ് പ്രിയന്‍ അറിയിച്ചിരിക്കുന്നത്. എന്നിട്ടും മമ്മൂട്ടി ടീമിന് ആ സിനിമ തുടങ്ങാനായില്ലെങ്കില്‍ മോഹന്‍ലാലിനെ നായകനാക്കി താന്‍ കുഞ്ഞാലിമരയ്ക്കാര്‍ തുടങ്ങുമെന്നാണ് പ്രിയന്‍ പറഞ്ഞിരിക്കുന്നത്.
അനാവശ്യമായ ഒരു മത്സരത്തിന് താല്‍പ്പര്യമില്ലാത്തതുകൊണ്ടാണ് തന്‍റെ പ്രൊജക്ട് വേണ്ടെന്നുവയ്ക്കാന്‍ തയ്യാറായതെന്നും എന്നാല്‍ 8 മാസം കൂടി മാത്രമേ കാത്തിരിക്കുകയുള്ളൂ എന്നുമാണ് പ്രിയന്‍റെ മുന്നറിയിപ്പ്. എട്ടുമാസത്തിനുള്ളില്‍ മമ്മൂട്ടിയെ നായകനാക്കി കുഞ്ഞാലിമരയ്ക്കാര്‍ ആരംഭിക്കാന്‍ സന്തോഷ് ശിവന് കഴിയുമോ? കാത്തിരിക്കാം.
