മമ്മൂക്ക രണ്ടും കല്‍പ്പിച്ചാണ് ! ലിജോ ജോസ് പെല്ലിശ്ശേരി ചിത്രത്തിന്റെ ഷൂട്ടിങ് ദൃശ്യങ്ങള്‍ ലീക്കായി, മെഗാസ്റ്റാറിന്റെ ലുക്ക് കണ്ട് ഞെട്ടി ആരാധകര്‍

അനൗണ്‍സ്‌മെന്റ് നടന്ന സമയം മുതല്‍ മമ്മൂട്ടി ആരാധകരും ലിജോ ജോസ് പെല്ലിശ്ശേരി ആരാധകരും വലിയ പ്രതീക്ഷകളോടെ കാത്തിരിക്കുന്ന സിനിമയാണ് നന്‍പകല്‍ നേരത്ത് മയക്കം. മമ്മൂട്ടിയും ലിജോ ജോസ് പെല്ലിശ്ശേരിയും ആദ്യമായി ഒന്നിക്കുന്ന സിനിമ പ്രേക്ഷകരെ ഞെട്ടിക്കുമെന്ന് ആരാധകര്‍ പ്രതീക്ഷിക്കുന്നു. ഇപ്പോള്‍ ഇതാ പ്രതീക്ഷകള്‍ ഇരട്ടിപ്പിച്ച് സിനിമയുടെ ഷൂട്ടിങ് ലൊക്കേഷനില്‍ നിന്നുള്ള ചിത്രങ്ങള്‍ ലീക്കായിരിക്കുന്നു. 

അടിമുടി വ്യത്യസ്ത ഗെറ്റപ്പിലാണ് ഈ ചിത്രങ്ങളില്‍ മമ്മൂട്ടിയെ കാണുന്നത്. മീശ പറ്റെവെട്ടി, ചുരുണ്ട മുടിയുമായി നില്‍ക്കുന്ന മമ്മൂട്ടിയെയാണ് ഒരു ചിത്രത്തില്‍ കാണുന്നത്. മറ്റൊരു ചിത്രത്തില്‍ കൈലിയുമെടുത്ത് നില്‍ക്കുന്ന മമ്മൂട്ടിയെ കാണാം.

എസ്.ഹരീഷ് ആണ് സിനിമയുടെ തിരക്കഥ. പഴനിയില്‍ ഷൂട്ടിങ് പുരോഗമിക്കുന്ന ചിത്രം മമ്മൂട്ടിയുടെ സ്വന്തം കമ്പനിയാണ് നിര്‍മ്മിക്കുന്നത്. പഴനിയിലും വേളാങ്കണ്ണിയിലുമായി 40 ദിവസത്തെ ഷൂട്ടിങ് ആണ് സിനിമയ്ക്ക് തീരുമാനിച്ചിരിക്കുന്നത്. തേനി ഈശ്വര്‍ ആണ് ഛായാഗ്രഹണം.