മമ്മൂട്ടി പരോളിൽ ഇറങ്ങുകയാണ്. മമ്മൂട്ടി നായകനാകുന്ന പരോൾ എന്ന ചിത്രത്തെ കുറിച്ചാണ് പറഞ്ഞ് വരുന്നത്. 12 വർഷത്തെ ഇടവേളയ്ക്ക് ശേഷമാണ് മമ്മൂട്ടി തനി നാടൻ കഥാപാത്രമായി എത്തുന്നതെന്ന പ്രത്യേകതയും ചിത്രത്തിനുണ്ട്. ശരത് സന്ദിത് സംവിധാനം ചെയ്ത പരോൾ ഈ വർഷം തന്നെ റിലീസ് ചെയ്യുമെന്നാണ് സൂചന.
മുന്‍പും ജയിലില്‍ കഴിയുന്ന കഥാപാത്രമായി മമ്മൂട്ടി തകര്‍ത്തഭിനയിച്ചിട്ടുണ്ട്. പരോളിലും ജയിലിൽ കഴിയുന്ന വ്യക്തിയായിട്ടാണ് മമ്മൂട്ടി എത്തുന്നത്. തനി നാടൻ കഥാപാത്രമാണ്. യഥാര്‍ത്ഥ സംഭവത്തില്‍ പ്രചോദനം ഉള്‍ക്കൊണ്ടാണ് മമ്മൂട്ടിയുടെ പരോള്‍ ഒരുക്കുന്നത്. സിനിമയുടെ ഫസ്റ്റ് ലുക്ക് പോസ്റ്ററില്‍ തന്നെ ഇക്കാര്യത്തെക്കുറിച്ച് സൂചന നല്‍കിയിട്ടുണ്ട്.
പരോളിന്റെ ഫസ്റ്റ് ലുക്ക് പോസ്റ്റര്‍ പുറത്തുവിടുമെന്ന് അണിയറപ്രവര്‍ത്തകര്‍ തന്നെയാണ് അറിയിച്ചത്. എന്നാല്‍ പറഞ്ഞ സമയത്തിനും മുന്‍പെ പോസ്റ്റര്‍ ലീക്കാവുകയായിരുന്നു. പിന്നീട് മണിക്കൂറുകള്‍ കഴിഞ്ഞാണ് ഒഫീഷ്യല്‍ ലുക്ക് പുറത്തുവിട്ടത്. അജിത്ത് പൂജപ്പുരയാണ് ചിത്രത്തിന് തിരക്കഥയൊരുക്കുന്നത്. പരസ്യ സംവിധാനത്തില്‍ നിന്നും സിനിമയില്‍ തുടക്കം കുറിക്കുകയാണ് ശരത്ത് സന്ദിത്ത്.