ശ്രീകുമാർ മേനോനെതിരെ മഞ്ജു വാര്യർ നൽകിയ പരാതി; കേസ് റദ്ദാക്കി ഹൈക്കോടതി

ഒടിയൻ എന്ന ചിത്രത്തിന് പിന്നാലെ സംവിധായകൻ ശ്രീകുമാർ മേനോന് എതിരെ നടി മഞ്ജു വാര്യർ പരാതി നൽകിയിരുന്നു. പരാതിയുടെ അടിസ്ഥാനത്തിൽ രജിസ്റ്റർ ചെയ്ത കേസ് ഹൈക്കോടതി റദ്ദാക്കി. ശ്രീകുമാർ മേനോൻ പ്രതിയായ കേസാണ് ഹൈക്കോടതി റദ്ദാക്കിയിരിക്കുന്നത്. സോഷ്യൽ മീഡിയകളിൽ ഉൾപ്പെടെ അപവാദപ്രചാരണം നടത്തിയെന്നായിരുന്നു മഞ്ജുവിന്റെ പരാതി.

ശ്രീകുമാർ മേനോന്റെ ആദ്യ ചിത്രം ഒടിയൻ പുറത്തുവന്നതിന് പിന്നാലെയാണ് മഞ്ജു വാര്യർ പരാതിയുമായി രംഗത്തെത്തിയത്. മോഹൻലാൽ നായകനായ ചിത്രത്തിൽ മഞ്ജു വാര്യർ ആയിരുന്നു നായിക. ചിത്രം റിലീസ് ചെയ്ത ശേഷം സൈബർ ആക്രമണം നേരിട്ടതായാണ് മഞ്ജു പരാതി നൽകിയത്. തൃശൂർ ടൗൺ ഈസ്റ്റ് പൊലീസ് ആയിരുന്നു കേസ് രജിസ്റ്റർ ചെയ്തത്. ഈ കേസിലെ തുടർ നടപടികളാണ് ഹൈക്കോടതി റദ്ദാക്കിയത്. 

ഹൈക്കോടതി ആവശ്യപ്പെട്ടിട്ടും മഞ്ജു വാര്യർ നാല് വർഷത്തോളം നിലപാട് അറിയിച്ചില്ല. തുടർന്നാണ് 2019 ഒക്ടോബർ 23ന് രജിസ്റ്റർ ചെയ്ത എഫ്ഐആർ റദ്ദാക്കിയത്. ഡിജിപിയ്ക്ക് മഞ്ജു വാര്യർ നേരിട്ട് നൽകിയ പരാതിയിലായിരുന്നു പൊലീസ് കേസെടുത്തിരുന്നത്. തന്നെ ഭീഷണിപ്പെടുത്തുകയും സമൂഹമാധ്യമങ്ങളിലടക്കം അപകീർത്തിപ്പെടുത്തുകയും ചെയ്തതായാണ് മഞ്ജു വാര്യരുടെ പരാതിയിൽ പറയുന്നത്. സംവിധായകൻ ശ്രീകുമാർ മേനോന് തന്നോട് വ്യക്തിവൈരാഗ്യമുണ്ടെന്നും പരാതിയിൽ പറയുന്നു.