അടുത്ത ജന്മം എന്റെ അമ്മയുടെ വയറ്റിൽ ജനിച്ചില്ലെങ്കിൽ ആ നടിയുടെ മകളായി ജനിക്കണം: മഞ്ജു പിള്ള

തട്ടിയും മുട്ടിയും എന്ന പരിപാടിയിലൂടെ ശ്രദ്ധേയ ആയ ആളാണ് മഞ്ജു പിള്ള. പിന്നീട് നിരവധി സിനിമകൾ ചെയ്‌തെങ്കിലും ഹോം എന്ന ചിത്രത്തിലെ പ്രകടനം മഞ്ജു പിള്ളയ്ക്ക് പ്രത്യേക ജനശ്രദ്ധ നേടിക്കൊടുത്തു. ഹോമിന് ശേഷം കൈ നിറയെ ചിത്രങ്ങളാണ് മഞ്ജുവിന് ലഭിച്ചത്. മഞ്ജു പിള്ളയ്ക്ക് അടുപ്പമുള്ളവരിൽ മുൻപന്തിയിൽ ഉള്ള ആളാണ് കെ.പി.എ.സി ലളിത. തങ്ങൾ തമ്മിൽ അമ്മ-മകൾ ബന്ധമായിരുന്നു ഉണ്ടായിരുന്നതെന്ന് സില്ലി മോങ്ക്സിന് നൽകിയ അഭിമുഖത്തിൽ മഞ്ജു പിള്ള പറയുന്നു. 

'ലളിതാമ്മയെ നേരിട്ട് ആദ്യമായി കണ്ട ദിനം എനിക്ക് മറക്കാൻ കഴിയില്ല. ആദ്യ കാഴ്ചയിൽ തന്നെ എന്നെ ചേർത്തുപിടിച്ചു. ശേഷം അമ്മയുടെ കൂടെ നിരവധി സിനിമകളിൽ അഭിനയിച്ചിട്ടുണ്ട്. ഞങ്ങൾ വളരെ അടുത്തു. എനിക്ക് ഒരു അമ്മയെ പോലെ തന്നെയായിരുന്നു. ഒരുപാട് വഴക്ക് പറയുമായിരുന്നു. ഞാൻ ഭക്ഷണം കളയുന്നതിന് വഴക്ക് പറയും. ഡയറ്റ് എടുക്കുന്നതിന് വഴക്ക് പറയും. കഴിഞ്ഞ ജന്മത്തിൽ എന്റെ അമ്മ ആയിരുന്നിരിക്കാം. നമ്മുടെ അമ്മ വഴക്ക് പറഞ്ഞാൽ നമുക്ക് ദേഷ്യം വരുമോ? അതുപോലെ തന്നെയാണ് ലളിതാമ്മയും.

എന്നോട് ലളിതാമ്മയ്ക്ക് വല്യ സ്നേഹമായിരുന്നു. എവിടെ പോയാലും ഡ്രെസും ഒർണമെന്റ്സും ഒക്കെ വാങ്ങിത്തരും. ഞാൻ എപ്പോഴും പറയാറുണ്ട്. അടുത്ത ജന്മത്തിൽ എനിക്ക് എന്റെ അമ്മയുടെ വയറ്റിൽ ജനിക്കാൻ പറ്റില്ലായെങ്കിൽ ലളിതാമ്മയുടെ മകളായി ജനിച്ചാൽ മതി. അത്രയ്ക്ക് അടുപ്പമായിരുന്നു തമ്മിൽ', മഞ്ജു പിള്ള പറയുന്നു.