ചെന്നൈയിൽ നടന്ന 'ജസ്റ്റ് ഫോർ വിമൻ' പുരസ്കാര ചടങ്ങിൽ തിളങ്ങി മഞ്ജു വാര്യർ. സദസിനെ ഞെട്ടിച്ച മഞ്ജുവിന്റെ പ്രസംഗമാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. രാജ്യത്തെ മുറിവേറ്റ സ്ത്രീകൾക്കും മഹാപ്രളയത്തെ അതിജീവിച്ച സ്വന്തം നാടിനും ജെഎഫ്ഡബ്ല്യു പുരസ്കാരം സമർപ്പിക്കുന്നതായി മഞ്ജു പറഞ്ഞു.
'എന്നെ സംബന്ധിച്ചിടത്തോളം ഓരോ പുരസ്കാരങ്ങളും പ്രോചദനത്തേക്കാൾ മുകളിലാണ്. ജീവിതത്തിൽ നാം കണ്ടുമുട്ടുന്ന ഓരോരുത്തരും എന്തെങ്കിലും ഒന്നു നിങ്ങളെ പഠിപ്പിക്കും. സുരക്ഷയും അഭിമാനവും ചോദ്യം ചെയ്യപ്പെടുന്ന ഈ രാജ്യത്തെ സ്ത്രീകളെ കുറിച്ചാണ് ഞാൻ ഓർക്കാൻ ആഗ്രഹിക്കുന്നത്. രാജ്യത്തെ വേദനിക്കുന്ന സ്ത്രീകൾക്കായി ഈ പുരസ്കാരം ഞാൻ സമർപ്പിക്കുന്നു. എല്ലായ്പ്പോഴും അവർക്കൊപ്പമായിരിക്കും എന്റെ നിലപാടുകളെന്ന് ഞാൻ വാക്കു നൽകുന്നു‘- മഞ്ജു പറഞ്ഞു.
പുരസ്കാരം സ്വീകരിച്ച് ഇംഗ്ലിഷിലാണ് മഞ്ജു പ്രസംഗിച്ചത്. മഞ്ജുവിന്റെ പ്രസംഗം കേട്ട് അന്തിച്ചിരിക്കുകയായിരുന്നു സദസ്. സബ്ടൈറ്റിൽ ഇല്ലാതെ ഇംഗ്ലിഷ് സിനിമ കാണുന്ന പോലെ, എന്നായിരുന്നു മഞ്ജുവിന്റെ ഗംഭീരൻ പ്രസംഗം കേട്ട് അവതാരകന്റെ കമന്റ്.
