തന്നെ കാത്തിരിക്കുന്ന ആരാധകരോട് അവസാന വാക്കായിട്ടായിരുന്നു കാളിദാസ് ജയറാം പൂമരത്തിന്റെ റിലീസിനെ കുറിച്ച് പറഞ്ഞത്. ദൈവം സഹായിച്ചാല്‍ മാര്‍ച്ച് 9ന് സിനിമ തിയറ്ററുകളിലേക്ക് എത്തുമെന്നായിരുന്നു കാളിദാസ് പറഞ്ഞിരുന്നത്.
എന്നാല്‍ സിനിമയുടെ റിലീസ് വീണ്ടും മാറ്റിയിരിക്കുകയാണ്. ദൈവം സഹായിച്ചില്ല എന്നുവേണം കരുതാൻ. ഏതായാലും ട്രോളർമാർക്ക് ഓരോ അവസരം ഉണ്ടാക്കിക്കൊണ്ടിരിക്കുകയാണ് കാളിദാസനും അണിയറ പ്രവർത്തകരും. മാർച്ച് 8ന് ചിത്രം റിലീസ് ചെയ്യില്ലെന്നും കുറച്ചുകൂടി മുന്നോട്ട് പോകുമെന്നും കാളിദാസ് ഫേസ്ബുക്കിൽ കുറിച്ചു.
ചിത്രത്തിന്റെ റിലീസ് വൈകിയതിനെ തുടര്‍ന്ന് സോഷ്യല്‍ മീഡിയയില്‍ നിരവധി ട്രോളുകള്‍ വന്നിരുന്നു. ട്രോളുകള്‍ കാളിദാസ് തന്നെ ഫേസ്ബുക്കില്‍ ഷെയര്‍ ചെയ്യുകയും ചെയ്തിരുന്നു. മുമ്പ് നിരവധി തവണ റിലീസ് പ്രഖ്യാപിച്ചിട്ടും റിലീസ് ചെയ്യാതിരുന്നതിനാല്‍ പുതിയ തിയതി പുറത്ത് വന്നപ്പോഴും ട്രോളന്മാര് ട്രോളുമായി ഇറങ്ങിയിരുന്നു.
ഫേസ്ബുക്കിലൂടെ പുറത്ത് വിട്ട കുറിപ്പില്‍ എന്താണ് കാര്യമെന്നും പൂമരത്തിന്റെ റിലീസ് അധികം വൈകില്ലെന്ന കാര്യവും കാളിദാസ് പറഞ്ഞിട്ടുണ്ട്. ഇറങ്ങാത്ത സിനിമയ്ക്ക് റിവ്യൂ എഴുതി ട്രോളന്മാര് പ്രതികരിച്ചിരുന്നു. വീണ്ടും റിലീസ് മാറ്റിയതോടെ ട്രോളന്മാരും സജീവമാവുമെന്ന കാര്യത്തില്‍ സംശയമില്ല.