മോഹന്‍ലാലിനൊപ്പം 'ആര്‍.ഡി.എക്‌സ്' നിര്‍മ്മാതാവ്, പ്രതീക്ഷയോടെ ആരാധകര്‍, നടന് പിറന്നാള്‍ ആശംസ നേര്‍ന്ന് സോഫിയ പോള്‍

മിന്നല്‍ മുരളിക്ക് ശേഷം വീക്കെന്‍ഡ് ബ്ലോക്ക് ബസ്റ്റേഴ്‌സിന്റെ ബാനറില്‍ സോഫിയ പോള്‍ നിര്‍മ്മിച്ച ആര്‍.ഡി.എക്‌സും വന്‍ വിജയമായി മാറിയിരുന്നു. പുതിയ സിനിമകളുടെ പണിപ്പുരയിലാണ് സോഫിയ പോളും വീക്കെന്‍ഡ് ബ്ലോക്ക് ബസ്റ്റേഴ്‌സും. മലയാളത്തിന്റെ താര രാജാവ് മോഹന്‍ലാലിനൊപ്പം ഒരു സിനിമ ചെയ്യുക എന്നത് ഏവരുടെയും സ്വപ്നമാണ്. അദ്ദേഹത്തിനൊപ്പം പ്രവര്‍ത്തിക്കുക എന്നത് ഒരു സ്വപ്ന സാക്ഷാത്കാരമാണെന്ന് സോഫിയ പോള്‍ പറയുന്നു. മോഹന്‍ലാലിന് ജന്മദിനാശംസകള്‍ നേര്‍ന്നുകൊണ്ട് സോഫിയ ഒരു കുറിപ്പ് പങ്കുവെച്ചു. 

'ലാലേട്ടന് ജന്മദിനാശംസകള്‍! മോഹന്‍ലാല്‍ നാല് പതിറ്റാണ്ടിലേറെയായി മലയാള സിനിമയെ നിര്‍വചിച്ച ഒരു യഥാര്‍ത്ഥ ഐക്കണും ഇതിഹാസവുമാണ്. ഈ വര്‍ഷങ്ങളില്‍ അദ്ദേഹം അനശ്വരമാക്കിയ നിരവധി കഥാപാത്രങ്ങളും മാനറിസങ്ങളും ഡയലോഗുകളും തലമുറകള്‍ അറിഞ്ഞും അറിയാതെയും അനുകരിക്കുന്നു, അത് തുടരും. അദ്ദേഹത്തോടൊപ്പം പ്രവര്‍ത്തിക്കുക എന്നത് ഒരു സ്വപ്ന സാക്ഷാത്കാരമായിരുന്നു. നിങ്ങള്‍ക്ക് അതിശയിപ്പിക്കുന്ന സിനിമകളുടെയും അനുഗ്രഹങ്ങളുടെയും മറ്റൊരു മഹത്തായ വര്‍ഷം ആശംസിക്കുന്നു',-സോഫിയ പോള്‍ കുറിച്ചു.

'ആര്‍.ഡി.എക്‌സ്' വന്‍ വിജയമായതിന് പിന്നാലെ നിര്‍മ്മാതാക്കളായ വീക്കെന്‍ഡ് ബ്ലോക്ക്ബസ്റ്റേഴ്‌സ് പുതിയ ചിത്രം പ്രഖ്യാപിച്ചത് അടുത്തിടെയായിരുന്നു. 'പ്രൊഡക്ഷന്‍ നമ്പര്‍ 7' എന്ന് താല്‍ക്കാലികമായി പേരിട്ടിരിക്കുന്ന സിനിമയുടെ ചിത്രീകരണം പൂര്‍ത്തിയായി. സോഫിയ പോള്‍ നിര്‍മ്മിക്കുന്ന പുതിയ ചിത്രത്തിലും നായകന്‍ ആന്റണി വര്‍ഗീസ് തന്നെ. നവാഗതനായ അജിത്ത് മാമ്പള്ളിയാണ് സിനിമ സംവിധാനം ചെയ്യുന്നത്. കടല്‍ പശ്ചാത്തലത്തില്‍ ഒരുങ്ങുന്ന ഒരു റിവഞ്ച് ആക്ഷന്‍ ഡ്രാമയാണ് ചിത്രം . റോയലിന്‍ റോബര്‍ട്ട്, സതീഷ് തോന്നക്കല്‍, അജിത് മാമ്പള്ളി എന്നിവര്‍ ചേര്‍ന്നാണ് തിരക്കഥ ഒരുക്കിയിരിക്കുന്നത്. സംഗീതം പശ്ചാത്തല സംഗീതം സാം സി.എസ്.

ആര്‍ഡിഎക്‌സ് പോലെ തന്നെ വലിയ പ്രതീക്ഷയാണ് ആരാധകര്‍ക്ക്. വിശാലമായ ക്യാന്‍വാസില്‍ ബിഗ് ബജറ്റില്‍ തന്നെയാണ് ചിത്രം ഒരുങ്ങുന്നത്.