ജോസഫിനും പൊറിഞ്ചുവിനും ശേഷം ജോജുവിന്‍റെ പ്രതിഫലം കുത്തനെ കൂടിയോ? റോഷന്‍ ആന്‍ഡ്രൂസ് ചിത്രത്തില്‍ നിന്ന് ജോജു പുറത്തുപോയതിന് കാരണമെന്ത്?

വലിയ ഹിറ്റുകള്‍ തുടര്‍ച്ചയായി സംഭവിക്കുമ്പോള്‍ താരങ്ങള്‍ പ്രതിഫലം വര്‍ദ്ധിപ്പിക്കുന്നത് സാധാരണയാണ്. മലയാളത്തിലെ പ്രിയനടന്‍ ജോജു അത്തരത്തില്‍ പ്രതിഫലം വര്‍ദ്ധിപ്പിച്ചെന്നാണ് സോഷ്യല്‍ മീഡിയയില്‍ പ്രചരിക്കുന്ന വര്‍ത്തമാനം. ജോജുവിന്‍റെ പ്രതിഫലം താങ്ങാനാകാത്തതാണ് റോഷന്‍ ആന്‍ഡ്രൂസ് സംവിധാനം ചെയ്യുന്ന പ്രതി പൂവന്‍‌കോഴി എന്ന ചിത്രത്തില്‍ സംവിധായകന്‍ തന്നെ അഭിനയിക്കേണ്ടി വന്നതിന്‍റെ കാരണമെന്നും സോഷ്യല്‍ മീഡിയയില്‍ പ്രചരണമുണ്ട്.

വെറും എട്ടുദിവസം അഭിനയിക്കുന്നതിനായി നമ്മുടെ താരങ്ങള്‍ വമ്പന്‍ പ്രതിഫലമാണ് ചോദിച്ചതെന്ന് റോഷന്‍ ആന്‍ഡ്രൂസ് പറയുന്നു. അത്രയും പ്രതിഫലം നല്‍കി അഭിനയിപ്പിക്കാന്‍ കഴിയാത്തതിനാല്‍ താന്‍ തന്നെ അഭിനയിക്കാന്‍ തീരുമാനിച്ചതായും റോഷന്‍ വ്യക്തമാക്കുന്നു.

ജോസഫിന് പിന്നാലെ പൊറിഞ്ചു മറിയം ജോസും സൂപ്പര്‍ഹിറ്റായതോടെ ജോജുവിന്‍റെ താരമൂല്യം കുതിച്ചുയര്‍ന്നിരിക്കുകയാണ്. അടുത്ത സൂപ്പര്‍താരമായി ജോജു മാറും എന്നാണ് സിനിമാവിദഗ്ധരുടെ പ്രവചനം. മാര്‍ട്ടിന്‍ പ്രക്കാട്ട് സംവിധാനം ചെയ്യുന്ന പുതിയ ചിത്രത്തിലും ജോജു ആണ് നായകന്‍.