വയലറ്റ് പൂക്കളുമായി സത്യൻ അന്തിക്കാടിനെ കാണാൻ സുരേഷ് ഗോപിയെത്തി! കാരണം ആ മമ്മൂട്ടി ചിത്രം

സംവിധായകൻ സത്യൻ അന്തിക്കാടിന് കഴിഞ്ഞ ദിവസം ഒരു അതിഥി ഉണ്ടായിരുന്നു. മറ്റാരുമായിരുന്നില്ല, സുരേഷ് ഗോപി ആയിരുന്നു അത്. സത്യൻ അന്തിക്കാടിനെ കാണാനെത്തിയ സുരേഷ് ഗോപിയേക്കാൾ ചർച്ചയായത് അദ്ദേഹം കൊണ്ടുവന്ന പൂച്ചെണ്ട് ആയിരുന്നു. വയലറ്റ് നിറത്തിലുള്ള പൂച്ചെണ്ട് ആയിരുന്നു അത്. ആ നിറം തിരഞ്ഞെടുക്കാൻ ഒരു കാരണമുണ്ട്. വർഷങ്ങൾക്ക് മുൻപിറങ്ങിയ ഒരു മമ്മൂട്ടി ചിത്രമായിരുന്നു ആ വയലറ്റ് പൂക്കൾ കൊണ്ട് സുരേഷ് ഗോപി ഓർമപ്പെടുത്തിയത്.

വയലറ്റു പൂക്കളുമായി എത്തിയതിന് പിന്നിലെ കഥയറിഞ്ഞപ്പോൾ സുരേഷിന്റെ ഓർമ്മ അപാരം തന്നെ എന്നായിരുന്നു സത്യൻ അന്തിക്കാടിന്റെ പ്രതികരണം. സത്യൻ അന്തിക്കാടുമായി സുരേഷ് ഗോപി ഒരുപാട് ചിത്രങ്ങളൊന്നും ചെയ്തിട്ടില്ല. ചെയ്തവയെല്ലാം മനോഹരമായിരുന്നു.  അത്തരത്തിൽ ഇന്നും പ്രേക്ഷകരെ ചിരിപ്പിക്കുകയും ചിന്തിപ്പിക്കുകയും ചെയ്ത ഒരു മമ്മൂട്ടി ചിത്രത്തിൽ അപ്രതീക്ഷിത കഥാപാത്രവുമായി സുരേഷ് ഗോപിയും എത്തിയിരുന്നു.

മമ്മൂട്ടി, നീന എന്നിവർ കേന്ദ്ര കഥാപാത്രങ്ങളെ അവതരിപ്പിച്ച ശ്രീധരന്റെ ഒന്നാം തിരുമുറിവാണ് ആ ചിത്രം. ഇതിലെ നായിക നീനക്കുറിപ്പിനൊപ്പം സുരേഷ് ഗോപിയുടെ സിനിമയിലേക്കുള്ള ഇൻട്രോ സീനിന്റെ പശ്ചാത്തലത്തിൽ മനോഹരമായ വയലറ്റ് പൂക്കളും ഉണ്ട്. ആ വയലറ്റ് ആണ് പൂച്ചെണ്ടിൽ പ്രതീകാത്മാകമായി സുരേഷ് ഗോപി ചേർത്തത്.