ബ്ലെസ്സിയുടെ ആടുജീവിതം പുറത്തിറങ്ങിയതിന് പിന്നാലെ ബെന്യാമിന്റെ അതേ പേരിലുള്ള നോവലും നജീബും അനാവശ്യമായ വിവാദങ്ങളില്‍ അകപ്പെട്ടിരുന്നു. സോഷ്യല്‍ മീഡിയയില്‍ ഉയരുന്ന ചര്‍ച്ചകളില്‍ പ്രതികരണവുമായി എത്തിയിരിക്കുകയാണ് നജീബ്. സോഷ്യല്‍ മീഡിയയില്‍ നടക്കുന്ന വിവാദങ്ങള്‍ തന്റെ മനസ്സിനെ വേദനിപ്പിച്ചുവെന്ന് അദ്ദേഹം പറയുന്നു.
തന്നോട് നോവലിസ്റ്റായ ബെന്യാമനും സംവിധായകന്‍ ബ്ലെസ്സിയും എന്തോ ക്രൂരത കാണിച്ചെന്ന് തരത്തിലാണ് പലരുടെയും പ്രതികരണമെന്ന് നജീബ് പറയുന്നു. ഇരുവര്‍ക്കും എതിരെ താന്‍ എവിടെയും ഒരു പരാതിയും ഉന്നയിച്ചിട്ടില്ലെന്നും അദ്ദേഹം വ്യക്തമാക്കി. നല്ല അനുഭവങ്ങള്‍ അല്ലാതെ മറ്റൊന്നും ഉണ്ടായിട്ടില്ലെന്ന് പറയുന്ന നജീബ് തന്റെ പേരില്‍ അവരെ അപമാനിക്കരുതെന്നും ആവശ്യപ്പെട്ടു.
2008 നോവല്‍ പുറത്തിറങ്ങിയത് മുതല്‍ ഇന്നുവരെ തനിക്ക് അര്‍ഹിക്കുന്നതിനപ്പുറം പരിഗണന ലഭിച്ചിട്ടുണ്ട്. പ്രവാസ ലോകത്ത് തന്നെ കൂട്ടിക്കൊണ്ടായിരുന്നു ബെന്യാമിന്‍ വേദികളില്‍ പോയിരുന്നതെന്നും നജീബ് പറഞ്ഞു.
തന്റെ ജീവിതാനുഭവം തന്നെയാണ് ആടുജീവിതത്തിന്റെ കഥയെന്നും അതുകൊണ്ടാണ് ഈ പരിഗണന ലഭിച്ചതെന്നും നജീബ് പറഞ്ഞു. ബഹ്‌റൈനില്‍ ആക്രിപ്പണി ചെയ്തിരുന്ന താന്‍ പ്രശസ്തനായതും ലോക കേരളസഭയില്‍ പ്രവാസികളുടെ പ്രതിനിധി ആയത് ബെന്യാമിന്‍ കാരണമാണെന്നും നജീബ് പറഞ്ഞു.
