മുണ്ടും മടക്കിക്കുത്തി മമ്മൂട്ടി റെക്കോർഡിങ്ങ് സ്റ്റുഡിയോയിൽ! - 'കള്ള്’ പാട്ട് വൈറലാകുന്നു!

വർഷങ്ങൾക്ക് ശേഷം മമ്മൂട്ടി പാട്ട് പാടി!

ജോയ് മാത്യുവിന്റെ തിരക്കഥയിൽ നവാഗതനായ ഗിരീഷ് ദാമോദര്‍ സംവിധാനം പുതിയ ചിത്രം അങ്കിൾ ഇന്ന് റിലീസിനൊരുങ്ങുകയാണ്. ചിത്രത്തിൽ മമ്മൂട്ടി ഒരു ഗാനം ആലപിക്കുന്നുണ്ട്. നീണ്ട ഒരു ഇടവേളയ്ക്ക് ശേഷം മമ്മൂട്ടി പാടുന്ന പാട്ടിന്റെ മേക്കിങ് വീഡിയോ ഇന്നലെ അണിയറ പ്രവർത്തകർ പുറത്തുവിട്ടിരിക്കുകയാണ്.

‘എന്താ ജോൺസാ കള്ളില്ലേ ?’ എന്നു തുടങ്ങുന്ന ഗാനം മമ്മൂട്ടി പാടുന്നതിന്റെ മെയ്ക്കിങ് വിഡിയോയാണ് പുറത്തു വന്നിരിക്കുന്നത്. ബിജിബാൽ ഈണം കൊടുത്തിരിക്കുന്ന പാട്ട് അതീവരസകരവും മനോഹരവുമായാണ് മമ്മൂട്ടി ആലപിക്കുന്നത്.

വായ്മൊഴിയായി പകർന്നു വന്ന ഈ നാടൻ പാട്ടിന് അൽപം മാറ്റങ്ങളൊക്കെ വരുത്തിയാണ് ചിത്രത്തിൽ ഉപയോഗിച്ചിരിക്കുന്നത്. മെയ്ക്കിങ് വിഡിയോയിൽ ഒരു പാട്ടു പാടുന്ന പിരിമുറക്കങ്ങളൊന്നുമില്ലാതെ അനായാസമായി മമ്മൂട്ടി ഗാനം ആലപിക്കുന്നത് കാണാം. 

സംഗീതസംവിധായകനായ ബിജിബാലിനും ചിത്രത്തിന്റെ സംവിധായകനായ ഗിരീഷ് ദാമോദറും ജോയ് മാത്യുവും സിദ്ദിദ്ദും സ്റ്റുഡിയോയിൽ മമ്മൂട്ടിക്കൊപ്പമുണ്ട്. ഇവരോടൊക്കെ രസകരമായി ഇടപെട്ട് തമാശരൂപേണയുള്ള ആംഗ്യങ്ങൾ കാണിച്ചാണ് മെഗാസ്റ്റാർ പാട്ടു പാടുന്നത്. 

നേരത്തെ ബിജിബാലിന്റെ തന്നെ ഈണത്തിൽ ലൗഡ്സ്പീക്കർ, ജവാൻ ഊഫ് വെള്ളിമല തുടങ്ങിയ ചിത്രങ്ങൾക്കായി മമ്മൂട്ടി പാടിയിട്ടുണ്ട്. ഷാജി എൻ. കരുണിന്റെ കുട്ടിസ്രാങ്ക്, ശ്യാമപ്രസാദിന്റെ ഒരേ കടൽ, രഞ്ജിത്തിന്റെ കയ്യൊപ്പ് എന്നീ ചിത്രങ്ങളിലും അദ്ദേഹം പാട്ടു പാടിയിട്ടുണ്ട്.