ഉണ്ണി മുകുന്ദനും മമ്മൂട്ടിയും ഒരുമിച്ച് നിരവധി സിനിമകൾ വന്നിട്ടുണ്ട്. അതിൽ അവസാനത്തേതാണ് മാസ്റ്റർപീസ്. എന്നാൽ, സേതു ആദ്യമായി സംവിധാനം ചെയ്യുന്ന ‘ഒരു കുട്ടനാടൻ ബ്ലോഗി’ൽ സംവിധായകനെ അസോസിയേറ്റ് ചെയ്യാൻ ഉണ്ണി തീരുമാനിച്ചിരുന്നു. പക്ഷേ, മറ്റ് ചിത്രങ്ങളുടെ തിരക്കിലായതിനാൽ ഏറ്റെടുക്കാൻ കഴിഞ്ഞില്ലെന്നും ഉണ്ണി പറയുന്നു.
നഷ്ടപ്പെട്ട അവസരത്തെ ഓർത്ത് നിരാശപ്പെട്ടിരുന്ന ഉണ്ണിക്ക് എല്ലാ നിരാശയും മറികടക്കുന്ന മറ്റൊരു അവസാരമാണ് സംവിധായകൻ നൽകിയത്. ചിത്രത്തിൽ ഉണ്ണി മുകുന്ദൻ ഒരു ഗാനം ആലപിക്കുന്നുണ്ട്. ഉണ്ണി മുകുന്ദൻ തന്നെയാണ് ഇക്കാര്യം ഫെയ്സ് ബുക്കിലൂടെ പങ്കുവച്ചത്. നവാഗതനായ ശ്രീനാഥാണ് ചിത്രത്തിന്റെ സംഗീത സംവിധായകൻ.
ഉണ്ണി മുകുന്ദന്റെ പോസ്റ്റിന്റെ പൂർണ രൂപം:
'കാമറയ്ക്കു പിന്നിൽ വളരെ സന്തോഷത്തോടെയും ആവശേത്തോടെയും ഒരു വേഷം ചെയ്യുകയാണ് ഞാൻ. 'ഒരു കുട്ടനാടൻ ബ്ലോഗി'ൽ ഗായകന്റെതാണ് വേഷം. ചിത്രത്തിൽ സേതുവിനെ അസോസിയേറ്റ് ചെയ്യാനുള്ള അവസരം ലഭിച്ചിരുന്നു. എന്നാൽ, മറ്റു ചില പ്രൊജക്ടുകൾ ഏറ്റെടുത്തതിനാൽ എനിക്ക് ഈ ചിത്രത്തിലെ അവസരം സ്നേഹ പൂർവം നിരസിക്കേണ്ടി വന്നു.
അതിലെ നിരാശ ഞാൻ ഒരു കുട്ടനാടൻ ബ്ലോഗിന്റെ സംവിധായകൻ സേതുവിനെ അറിയിച്ചിരുന്നു. അദ്ദേഹം എനിക്കു സഹോദരനെ പോലെയാണ്. എന്റെ നിരാശ അദ്ദേഹം മാറ്റിത്തന്നു. കിട്ടിയ ഈ അവസരം എല്ലാ നിരാശയും ഇല്ലാതാക്കുന്നതാണ്.
ഈ സിനിമയുടെ ആത്മാവായ ഗാനത്തിനു ശബ്ദം നൽകാൻ എനിക്കു കഴിഞ്ഞതിൽ വളരെ സന്തോഷം തോന്നുന്നു. ഞാൻ ഒരുപാട് സ്നേഹിക്കുന്ന മമ്മുക്കയുടെയും സേതു ചേട്ടന്റെയും സിനിമയാണ് ഇത്. സിനിമയിലെ ഗായക ലിസ്റ്റിൽ എന്റെ പേരു കാണുന്നതിനെ പറ്റി ചിന്തിക്കുമ്പോൾ അൽപം ഭയവും അതിലുപരി ആകാംക്ഷയുമുണ്ട്. ഈ ഗാനം പ്രേക്ഷകർ സ്വീകരിക്കുമെന്നാണ് എന്റെ പ്രതീക്ഷ'.