മമ്മൂട്ടിയുടെ മാസ്റ്റർപീസിനെ പിന്തള്ളി മായാനദി!

അത്ഭുതം! അമ്പരന്ന് ആരാധകർ

ഇത്തവണ ക്രിസ്തുമസ് റിലീസ് ആയി എത്തിയ സിനിമകൾ എല്ലാം ഫെസ്റ്റിവൽ ആഘോഷിക്കാൻ പറ്റിയ ചിത്രങ്ങളായി‌രുന്നു. ജയസൂര്യയുടെ ആട് 2 പ്രതീക്ഷിച്ചതിലും അധികം വിജയമാണ് നേടുന്നത്. കളക്ഷന്റെ കാര്യത്തിൽ ആട് ഒന്നാം സ്ഥാനത്താണ്. മമ്മൂട്ടി നായകനായ മാസ് ചിത്രം മാസ്റ്റർപീസും മോശമല്ല. 

എന്നാൽ, ഐശ്വര്യയും ടൊവിനോയും പ്രധാന കഥാപാത്രങ്ങളെ അവതരിപ്പിച്ച മായാനദി വിവാദമായിട്ടായിരുന്നു തിയേറ്ററുകളിൽ എത്തിയത്. നടി പാർവതി കസബയ്ക്കെതിരെ സംസാരിച്ചതും പാർവതിയുടെ സുഹൃത്തും നടിയുമായ റിമ കല്ലിങ്കൽ അതുകേട്ട് ചിരിച്ചതും റിമ മായാനദിയുടെ സംവിധായകൻ ആഷിഖ് അബുവിന്റെ ഭാര്യയാണെന്നതും മായാനദിയെ വിവാദത്തിലേക്ക് തള്ളിയിട്ടു.

സിനിമ കാണില്ലെന്ന് ഒരുകൂട്ടം ആളുകൾ പറഞ്ഞപ്പോൾ നല്ല സിനിമയെ പ്രോത്സാഹിപ്പിക്കണമെന്ന നിലപാട് ആയി‌രുന്നു ഭൂരിഭാഗം ആളുകൾക്കും. ആദ്യ ദിവസങ്ങളിൽ വലിയ തിരക്കൊന്നും ഇല്ലായിരുന്നുവെങ്കിലും പിന്നീട് ഹൗസ് ഫുൾ ഷോകൾ ആയിരുന്നു കാണാൻ കഴിഞ്ഞത്. കൊച്ചി മൾട്ടിപ്ലക്സിലും മികച്ച റിപ്പോർട്ടാണ് മായാനദി നേ‌ടിയത്.

സിനിമ റിലീസായി 16 ദിവസം കൊണ്ട് കൊച്ചി മള്‍ട്ടിപ്ലെക്‌സില്‍ നിന്നും 50 ലക്ഷമാണ് സിനിമ സ്വന്തമാക്കിയിരിക്കുന്നത്. കൊച്ചി മള്‍ട്ടിപ്ലെക്‌സിലെ കളക്ഷനില്‍ മായാനദി മമ്മൂട്ടിയുടെ മാസ്റ്റര്‍പീസിനെ പിന്തള്ളി രണ്ടാം സ്ഥാനത്ത് എത്തിയിരിക്കുകയാണെന്നാണ് റിപ്പോര്‍ട്ടുകള്‍. ആട് 2 ആണ് ക്രിസ്തുമസ് റിലീസിനെത്തി കളക്ഷനില്‍ മുന്നില്‍ നില്‍ക്കുന്നത്. സിനിമ ഇപ്പോഴും മോശമില്ലാത്ത പ്രകടനമാണ് നടത്തുന്നത്.