ജിമ്മിക്കി കമ്മല്‍ കോപ്പിയടിച്ചതോ? - ഷാന്‍ റഹ്മാന്‍ വ്യക്തമാക്കുന്നു

കോപ്പിയടിയുടെ കാര്യത്തില്‍ ഗോപിസുന്ദറിനു പി‌ന്‍ഗാമിയോ ഷാന്‍?

‘എന്റമ്മേടെ ജിമ്മിക്കി കമ്മല്‍ ... എന്റപ്പന്‍ കട്ടോണ്ട് പോയി...’

എന്നു തുടങ്ങുന്ന ഗാനം വൈറലായത് നിമിഷങ്ങള്‍ കൊണ്ടാണ്. സംഗീത സംവിധായകന്‍ ഷാന്‍ റഹ്മാന്റെ ഭാഗ്യമെന്ന് വേണമെങ്കില്‍ പറയാം. ഭാഷയുടെ അതിര്‍വരമ്പുകള്‍ കടന്ന് ആ ഗാനം എല്ലാവരും ഏറ്റെടുത്തതും ആഘോഷമാക്കിയതും അതുകൊണ്ട് തന്നെ.

എന്നാല്‍ കഴിഞ്ഞ കുറച്ചു ദിവസമായി സോഷ്യല്‍ മീഡിയകളില്‍ നിറഞ്ഞ് നില്‍ക്കുന്നത് മറ്റൊരു പാട്ടാണ്. ജിമ്മിക്കി കമ്മലുമായി സാമ്യമുള്ളൊരു ഗാനം. ഈ പാട്ടില്‍ നിന്നും ഷന്‍ റഹ്മാന്‍ കോപ്പിയടിച്ചതാണ് ജിമ്മിക്കി കമ്മലെന്നാണ് പൊതുവെയുള്ള സംസാരം. ഏതായാലും വാര്‍ത്ത വൈറലായതോടെ സംഭവത്തില്‍ വിശദീകരണവുമായി എത്തിയിരിക്കുകയാണ് ഷാന്‍ റഹ്മാന്‍. 

''ആരാണ് ഇതിനു പിന്നിലെന്നറിയില്ല. ഞാന്‍ കോപ്പിയടിച്ചു എന്ന് ആരോപിക്കുന്ന ഗാനത്തില്‍ എന്റെയും വിനീതിന്റെയും ശബ്ദം പോലും ഉപയോഗിച്ചിട്ടുണ്ട്. അതൊന്നും കേൾക്കാനുള്ള ക്ഷമ പോലും ആരും കാണിക്കുന്നില്ല. ഇതുവരെ എന്റെ ഒരു പാട്ടു പോലും കോപ്പിയടിച്ചുവെന്ന ആരോപണമുയരാൻ ഇടവരുത്തിയിട്ടില്ല. അതുകൊണ്ടു തന്നെ നല്ല വിഷമമുണ്ട്.‘ - എന്ന് ഷാന്‍ മനോരമ ഓണ്‍ലൈനോട് വ്യക്തമാക്കി.