ദുല്‍ഖറിനായി മമ്മൂട്ടി ആരോടും ശുപാര്‍ശ ചെയ്തിട്ടില്ല, ദുല്‍ഖര്‍ സ്വയം കഷ്ടപ്പെട്ട് വളരുകയായിരുന്നു: മണിയന്‍പിള്ള രാജു
‘ദുല്‍ഖറിനെ പോലെ കഷ്ടപ്പെട്ട് വളരണം’ - മകന് മണിയന്‍പിള്ള രാജുവിന്റെ വക ഉപദേശം
താരപുത്രന്മാര്‍ ഓരോരുത്തരായി സിനിമയിലേക്ക് വരികയാണ്. അക്കൂട്ടത്തില്‍ ഒരാള്‍ കൂടി. നിരഞ്ജ്. മണിയന്‍പിള്ള രാജുവിന്റെ രണ്ടാമത്തെ മകനാണ് നിരഞ്ജ്. നിരഞ്ജ് ആദ്യമായി അഭിനയിച്ച സിനിമ ‘ബ്ലാക്ക് ബട്ടർഫ്ലൈസ്’ ആണ്. ചിത്രത്തില്‍ വില്ലന്‍ വേഷമായിരുന്നു നിരഞ്ജ് ചെയ്തിരുന്നത്. നിരഞ്ജ് നായകനാകുന്ന ‘ബോബി’ ഇന്ന് തീയേറ്ററുകളില്‍ എത്തിയിരിക്കുകയാണ്.
മലയാള മനോരമക്ക് നല്‍കിയ അഭിമുഖത്തില്‍ തന്റെ സിനിമാ വിശേഷങ്ങളെ കുറിച്ച് ബോബി അച്ഛനോട് സംസാരിക്കുന്നുണ്ട്. ‘എന്നെ വെച്ച് സിനിമ നിര്‍മിക്കുമോ?’ എന്ന ചോദ്യത്തിന് മണിയന്‍പിള്ള രാജുവിന്റെ മറുപടി കിടിലന്‍ ആയിരുന്നു. കഷ്ടപ്പെട്ട് വളരണമെന്നാണ് നിരഞ്ജിനോട് അച്ഛന്‍ പറയുന്നത്. കൂടെ ഒരു ഉദാഹരണവും പറയുന്നുണ്ട്.
‘നിനക്കു വേണ്ടി ഞാന്‍ ഒരു സിനിമ എടുക്കില്ല. ഞാന്‍ ചെയ്യുന്ന സിനിമയില്‍ നിനക്ക് പറ്റിയ വേഷമുണ്ടെങ്കില്‍ അത് ചെയ്യാന്‍ വിളിക്കും. ദുൽഖറിനു വേണ്ടി മമ്മൂട്ടി ഇതുവരെ ആരോടെങ്കിലും ശുപാര്‍ശ ചെയ്തതായി എനിക്കറിയില്ല. സ്വയം കഷ്ടപ്പെട്ടാണ് ദുല്‍ഖര്‍ വളര്‍ന്നത്. അതുപോലെ നീയും നന്നായി കഷ്ടപ്പെട്ട് സ്വയം വളരണം‘. - മണിയന്‍പിള്ള രാജു പറയുന്നു.
