മമ്മൂട്ടിയെയോ മോഹന്‍ലാലിനെയോ ഇനി ചാനലുകള്‍ക്ക് കിട്ടില്ല!

നടിയെ ആക്രമിച്ച കേസില്‍ ദിലീപ് അറസ്റ്റിലായത് മലയാള സിനിമയെത്തന്നെ സ്തംഭിപ്പിച്ചിരിക്കുകയാണ്. ഈ കേസില്‍ മാധ്യമങ്ങള്‍ നടത്തിയ ഇടപെടലുകള്‍ നിര്‍ണായകമായതായാണ് താരപ്രമുഖരുടെ അഭിപ്രായം.

ചാനലുകള്‍ നടത്തുന്ന രാത്രിചര്‍ച്ചകള്‍ സിനിമാപ്രവര്‍ത്തകരെപ്പറ്റി മോശം ഇമേജ് സൃഷ്ടിക്കാന്‍ കാരണമായതായി സിനിമാതാരങ്ങള്‍ കരുതുന്നു. ദിലീപ് കേസുമായി ബന്ധപ്പെട്ട് ചാനലുകള്‍ സിനിമാമേഖലയ്ക്കുണ്ടാക്കിയ നാണക്കേടിന് പ്രതികാരം തീര്‍ക്കാന്‍ തന്നെയാണ് താരങ്ങള്‍ ഒരുങ്ങുന്നത്.

ഇനി ചാനലുകളുമായി പ്രമുഖ താരങ്ങള്‍ ആരും തന്നെ സഹകരിക്കേണ്ടെന്ന് ഒരു അപ്രഖ്യാപിത നിലപാട് താരങ്ങള്‍ എടുത്തതായാണ് വിവരം. ഓണക്കാലത്ത് ഈ നിലപാട് കര്‍ക്കശമാക്കാന്‍ തന്നെ തീരുമാനിച്ചിട്ടുണ്ട്.

മമ്മൂട്ടിയും മോഹന്‍ലാലും ഉള്‍പ്പടെയുള്ള താരങ്ങളൊന്നും ഈ ഓണക്കാലത്ത് ചാനല്‍ ചര്‍ച്ചകളിലോ അഭിമുഖങ്ങളിലോ മറ്റ് പരിപാടികളിലോ പങ്കെടുക്കില്ലെന്നാണ് റിപ്പോര്‍ട്ടുകള്‍. തങ്ങളെക്കൊണ്ട് റേറ്റിംഗ് കൂട്ടിയെടുക്കുന്ന ചാനലുകളുടെ തന്ത്രങ്ങള്‍ക്ക് ഇനി നിന്നുകൊടുക്കേണ്ടെന്ന നിലപാട് താരങ്ങള്‍ സ്വീകരിച്ചത് ആര്‍ക്കാണ് കൂടുതല്‍ നഷ്ടമുണ്ടാക്കുക എന്ന് കാത്തിരുന്ന് കാണാം.