ബാഹുബലി 2ന്‍റെ കളക്ഷന്‍ 800 കോടി കടന്നു. ഇന്ത്യന്‍ സിനിമയിലെ ഏറ്റവും വലിയ കളക്ഷന്‍ വേട്ട. രാജ്യത്തെ പ്രധാന സെന്‍ററുകളിലെല്ലാം പ്രദര്‍ശിപ്പിക്കുന്നത് ഈ രാജമൌലി വിസ്മയമാണ്. എന്നാല്‍ അതറിഞ്ഞുകൊണ്ടുതന്നെ, രണ്ടുംകല്‍പ്പിച്ച് ബാഹുബലിയെ നേരിടാന്‍ എത്തുകയാണ് ദുല്‍ക്കര്‍ സല്‍മാന്‍.
അതേ, ദുല്‍ക്കര്‍ നായകനാകുന്ന പുതിയ സിനിമ ‘സി ഐ എ’ വെള്ളിയാഴ്ച റീലീസാണ്. അമല്‍ നീരദ് സംവിധാനം ചെയ്യുന്ന ഈ പൊളിറ്റിക്കല്‍ ലവ് സ്റ്റോറി അമേരിക്കയിലാണ് കൂടുതല്‍ ഭാഗവും ചിത്രീകരിച്ചത്.
ബാഹുബലി പടയോട്ടം തുടരുമ്പോള്‍ തന്നെ ചങ്കുറപ്പോടെ അതിനെ നേരിട്ട് വിജയം നേടാന്‍ ദുല്‍ക്കര്‍ വരുന്നത് ഒട്ടൊരു അമ്പരപ്പോടെയും തെല്ല് വിസ്മയത്തോടെയുമാണ് ഇന്ത്യന്‍ സിനിമാലോകം വീക്ഷിക്കുന്നത്.
അജി മാത്യു എന്ന പാലാക്കാരന്‍ യുവാവ് തന്‍റെ പ്രണയിനിയെ തേടി അമേരിക്കയിലെത്തുന്നിടത്തുനിന്നാണ് സി ഐ എയുടെ കഥ ആരംഭിക്കുന്നത്. ‘കോമ്രേഡ് ഇന്‍ അമേരിക്ക’ എന്നാണ് സി ഐ എയുടെ പൂര്‍ണരൂപം. വാരണം ആയിരം എന്ന സൂര്യച്ചിത്രവുമായി സി ഐ എയുടെ കഥയ്ക്ക് നേരിയ ബന്ധമുണ്ട്.
കാര്‍ത്തിക മുരളീധരന്‍ നായികയാകുന്ന സിനിമയില്‍ തകര്‍പ്പന്‍ ആക്ഷന്‍ രംഗങ്ങളുണ്ട്. പേള്‍ ഹാര്‍ബര്‍, ലോഗന്‍, ഇന്‍സെപ്‌ഷന്‍ തുടങ്ങിയ സിനിമകളിലെ ആക്ഷന്‍ സീക്വന്‍സുകള്‍ ഒരുക്കിയ മാര്‍ക് ഷാവ്‌റിയയാണ് സി ഐ എയുടെ ആക്ഷന്‍ കോറിയോഗ്രാഫി.
ഗോപി സുന്ദര്‍ സംഗീതം നല്‍കുന്ന ചിത്രം അമല്‍ നീരദ് പ്രൊഡക്ഷന്‍സിന്‍റെ ബാനറില്‍ സംവിധായകന്‍ തന്നെയാണ് നിര്‍മ്മിക്കുന്നത്.