മോഹന്‍ലാലിന്‍റെ വില്ലന്‍ വീണ്ടും വരുന്നു, പ്രതീക്ഷയോടെ ആരാധകര്‍ !

മോഹന്‍ലാലിന്‍റെ വില്ലന്‍ വീണ്ടും വരുന്നു. ആ ചിത്രം നേരത്തേ ഒന്ന് വന്നതല്ലേ എന്നാണോ സംശയം? എങ്കില്‍ സംഭവം എന്താണെന്ന് പറയാം.

ഒരു മോഹന്‍ലാല്‍ ചിത്രത്തിലെ വില്ലന്‍ കഥാപാത്രത്തേക്കുറിച്ചാണ്. ചില വില്ലന്‍ കഥാപാത്രങ്ങള്‍ മലയാളികളെ എന്നും ഭയപ്പെടുത്തി കീഴടക്കിയിട്ടുണ്ട്. കീരിക്കാടന്‍ ജോസിനെ ആര്‍ക്ക് മറക്കാന്‍ പറ്റും? പുലിമുരുകനിലെ ഡാഡി ഗിരിജയോ?

ഇനി നമ്മള്‍ പറയാന്‍ പോകുന്നത് വിയറ്റ്‌നാം കോളനിയിലെ റാവുത്തറെക്കുറിച്ചാണ്. ആ ചിത്രം മെഗാഹിറ്റായപ്പോള്‍ പാവം കൃഷ്ണമൂര്‍ത്തിയെ പൊതിരെ തല്ലുന്ന ക്രൂരനായ റാവുത്തറെ ഭീതിയോടെ മലയാളികള്‍ നെഞ്ചേറ്റുകയായിരുന്നു.

പതിറ്റാണ്ടുകള്‍ കഴിഞ്ഞിട്ടും റാവുത്തര്‍ സൃഷ്ടിച്ച ഭയം പ്രേക്ഷകരില്‍ ഇപ്പോഴുമുണ്ട്. അത് ആ കഥാപാത്രത്തിന്‍റെ കരുത്തായിരുന്നു. സിദ്ദിക്‍ലാല്‍ സൃഷ്ടിച്ച ആ കഥാപാത്രത്തെ അവതരിപ്പിച്ചത് തെലുങ്ക് നടനായ വിജയ രംഗരാജു ആയിരുന്നു.

ഇപ്പോഴിതാ വിജയ രംഗരാജു വീണ്ടും വരികയാണ്. വിജയ് ആന്‍റണി നായകനാകുന്ന ‘അണ്ണാദുരൈ’ എന്ന തമിഴ് ചിത്രത്തിലെ പ്രധാന വില്ലനാണ് വിജയ രംഗരാജു. വര്‍ഷങ്ങള്‍ക്ക് മുമ്പ് വിയറ്റ്നാം കോളനിയില്‍ സൃഷ്ടിച്ച തരംഗം അണ്ണാദുരൈയിലും ആവര്‍ത്തിക്കാനാകുമെന്നാണ് അദ്ദേഹം കരുതുന്നത്.