നാദിര്‍ഷ സംവിധാനം ചെയ്യുന്ന പുതിയ ചിത്രത്തില്‍ മമ്മൂട്ടി നായകനാകുന്നു എന്നായിരുന്നു നേരത്തേ റിപ്പോര്‍ട്ടുകള്‍ വന്നത്. എന്നാല്‍ പുതിയ വിവരം അനുസരിച്ച് നാദിര്‍ഷയുടെ അടുത്ത പടത്തിലെ നായകന്‍ ദിലീപാണ്. സജീവ് പാഴൂരാണ് ചിത്രത്തിന് തിരക്കഥ രചിക്കുന്നത്.
ഏറെ പ്രത്യേകതകളുള്ള ഒരു കഥാപാത്രത്തെയാണ് ഈ സിനിമയില്‍ ദിലീപ് അവതരിപ്പിക്കുന്നത്. ഇതിനായി ശരീരഭാരം വളരെയധികം കൂട്ടേണ്ടതുണ്ട്. ദിലീപ് അതിന് തയ്യാറെടുത്തുകഴിഞ്ഞു എന്നാണ് വിവരം.
തൊണ്ടിമുതലും ദൃക്‌സാക്ഷിയും എന്ന സിനിമയ്ക്ക് ശേഷം സജീവ് പാഴൂര്‍ തിരക്കഥയെഴുതുന്ന ചിത്രമായിരിക്കും ഇത്. സമീപകാലത്ത് വന്ന ദിലീപ് ചിത്രങ്ങള്‍ക്കൊന്നും മികച്ച വരവേല്‍‌പ്പ് ലഭിച്ചില്ല. അതുകൊണ്ടുതന്നെ ദിലീപ് - നാദിര്‍ഷ കൂട്ടുകെട്ടില്‍ വരുന്ന സിനിമയെക്കുറിച്ച് വന്‍ പ്രതീക്ഷയാണുള്ളത്.
അമര്‍ അക്ബര്‍ അന്തോണി, കട്ടപ്പനയിലെ ഹൃത്വിക് റോഷന്‍ എന്നീ സൂപ്പര്‍ഹിറ്റുകള്‍ക്ക് ശേഷം നാദിര്‍ഷ സംവിധാനം ചെയ്യുന്ന ചിത്രമാണിത്. ദിലീപ് ചിത്രത്തിന് ശേഷം മമ്മൂട്ടി കുള്ളനായി അഭിനയിക്കുന്ന ചിത്രത്തിന്‍റെ ജോലികള്‍ നാദിര്‍ഷ ആരംഭിക്കും.
