36 വർഷങ്ങൾ നീണ്ട കാത്തിരിപ്പിനൊടുവിൽ ലോകചാമ്പ്യന്മാരായിരിക്കുകയാണ് അർജൻ്റീന. സന്തോഷത്തിൻ്റെ ഈ നിമിഷത്തിൽ എന്ത് ചെയ്യണമെന്ന് അറിയാത്ത അവസ്ഥയിൽ ലുസെയ്ൽസ് സ്റ്റേഡിയത്തിൽ കൂടിയിരുന്നവരെല്ലാം തന്നെ തങ്ങൾക്ക് മുന്നിൽ നടക്കുന്ന കാഴ്ച എങ്ങനെ ആഘോഷിക്കുമെന്ന സംശയത്തിലായിരുന്നു. പലരും ചിരിച്ചും കെട്ടിപ്പിടിച്ചും ആർത്തുവിളിച്ചും ആഘോഷിച്ചപ്പോൾ ഗാലറിയിലുണ്ടായിരുന്ന അർജൻ്റീനൻ ആരാധികയുടെ ആഹ്ളാദപ്രകടനം അതിരുവിട്ടു.
നിശ്ചിതസമയത്തും അധികസമയത്തും സമനിലയിലായ മത്സരം ഷൂട്ടൗട്ടിലേക്ക് നീണ്ടപ്പോൾ ഗോണ്‍സാലോ മൊണ്ടിയെലിന്റെ കിക്ക് വലയില്‍ കയറിയതിനു പിന്നാലെ ലോകമെമ്പാടും അര്‍ജന്റീനൻ ആരാധകർ മതിമറന്നു. ധരിച്ചിരുന്ന മേൽവസ്ത്രങ്ങൾ ഊരിയെറിഞ്ഞുകൊണ്ടാണ് ഗാലറിയിലെ ഒരു ആരാധിക ഗോൾ നേട്ടം ആഘോഷിച്ചത്. വസ്ത്രധാരണത്തെ പറ്റി കർശന നിയമങ്ങളുള്ള ഖത്തറിൽ ഇത്തരത്തിൽ ഒരു പ്രവർത്തിയുണ്ടായതിനാൽ ആരാധികയ്ക്കെതിരെ നടപടി ഉണ്ടാകാൻ സാധ്യതയുണ്ട്.
ഖത്തർ നിയമപ്രകാരം ഒരു പരിധിക്കപ്പുറം പുറത്തുകാണുന്ന രീതിയിലുള്ള വസ്ത്രധാരണം പാടില്ലെന്ന് നിർദേശമുണ്ട്.തോളുകളും കാല്‍മുട്ടുകളും മറയ്ക്കുന്ന രീതിയിലുള്ള വസ്ത്രധാരണം വേണമെന്നാണ് ഖത്തര്‍ നിയമത്തില്‍ പറയുന്നത്.
