എനിക്ക് ഇവിടെ ഒരുപാട് കാലം കളിക്കണമെന്നുണ്ട്, അത്രമാത്രം ഞാൻ ടീമിനെ സ്നേഹിക്കുന്നു: അഡ്രിയാൻ ലൂണ

ഐഎസ്എല്ലിലെ ഏറ്റവും ആരാധകരുള്ള ടീമെന്ന സ്ഥാനം സ്വന്തമായിട്ടും ഇതുവരെയും ഒരു ഐഎസ്എല്‍ കിരീടവും സ്വന്തമാക്കാന്‍ കേരളത്തിനായിട്ടില്ല. ഐഎസ്എല്‍ കിരീടത്തിനായുള്ള പോരാട്ടത്തില്‍ ടീമിന് വേണ്ടി പോരടിച്ച പല കളിക്കാരെയും നെഞ്ചോട് ചേര്‍ത്താണ് കേരളം സ്വീകരിച്ചിട്ടുള്ളത്. അതില്‍ തന്നെ ഏറ്റവും പ്രധാനിയായ താരമാണ് നിലവിലെ ബ്ലാസ്‌റ്റേഴ്‌സ് നായകനായ അഡ്രിയാന്‍ ലൂണ.രണ്ട് വര്‍ഷത്തെ കരാറില്‍ മെല്‍ബണ്‍ സിറ്റി എഫ് സിയില്‍ നിന്നും കേരള ബ്ലാസ്‌റ്റേഴിലെത്തിയ ലൂണയ്ക്കും ഏറ്റവും പ്രിയപ്പെട്ട ക്ലബ് കേരള ബ്ലാസ്‌റ്റേഴ്‌സ് തന്നെയാണ്.

കേരള ബ്ലാസ്‌റ്റേഴ്‌സിലെത്തി 2 വര്‍ഷം പൂര്‍ത്തിയാകുമ്പോള്‍ കേരള ബ്ലാസ്‌റ്റേഴ്‌സ് എന്ന ക്ലബിനോടും ടീമിന്റെ ആരാധകരോടുമുള്ള സ്‌നേഹം അറിയിച്ചിരിക്കുകയാണ് അഡ്രിയാന്‍ ലൂണ.സാധ്യമായ കാലമത്രയും ബ്ലാസ്‌റ്റേഴ്‌സിന് വേണ്ടി കളിക്കാനാണ് ആഗ്രഹമെന്ന് ലൂണ പറയുന്നു. ടീമിനൊപ്പം മികച്ച പ്രകടനങ്ങള്‍ നടത്തിയ പല താരങ്ങളൂം ക്ലബ് വിട്ടിട്ടും ലൂണ ഇപ്പോഴും ബ്ലാസ്‌റ്റേഴ്‌സിനൊപ്പം തന്നെയാണ്. മറ്റാരെ വിട്ടുകൊടുത്താലും ലൂണയെ വിട്ടുകൊടുക്കരുതെന്നാണ് ആരാധകരും ക്ലബ് അധികൃതരോട് പറയുന്നത്. ഈ സീസണില്‍ കേരളത്തിനായി കിരീടം സ്വന്തമാക്കാന്‍ ലൂണയ്ക്ക് സാധിക്കുമെന്ന് തന്നെ ആരാധകര്‍ ഉറച്ചുവിശ്വസിക്കുന്നുണ്ട്. ഇതിനിടെയാണ് ക്ലബിനോടുള്ള തന്റെ ഇഷ്ടം ലൂണ പരസ്യമാക്കിയത്.