റൂണിയ്ക്ക് അസൂയയെന്ന് റൊണാൾഡോ, പിന്നാലെ വായടപ്പിക്കുന്ന മറുപടിയുമായി റൂണി

മാഞ്ചസ്റ്റർ യുണൈറ്റഡിൽ ഒരുമിച്ച് പന്ത് തട്ടിയിരുന്ന താരങ്ങൾ പരസ്‌പരം കൊമ്പുകോർക്കുന്നതാണ് ഫുട്‌ബോൾ ലോകത്തെ പ്രധാന ചർച്ചാവിഷയം. റൊണാൾഡൊയെ ടീമിലെത്തിച്ച നീക്കം മാഞ്ചസ്റ്ററിന് തിരിച്ചടിയായെന്ന വെയ്‌ൻ റൂണിയുടെ പരാമർശമാണ് പ്രശ്‌നങ്ങൾക്ക് തുടക്കമിട്ടത്. ഇതിന് പിന്നാലെ റൂണിയുടെ ഒരു ചിത്രത്തിന് താഴെ അസൂയക്കാർ എന്ന് റൊണാൾഡോ കുറിച്ചത്. ഇതിന് മറുപടിയുമായി രംഗത്തെത്തിയിരിക്കുകയാണ് വെയ്‌ൻ റൂണി.

ഇന്ന് രാവിലെയാണ് ഞാൻ അത് കണ്ടത്. ക്രിസ്റ്റ്യാനോയോട് അസൂയ തോന്നാത്ത ഒരു ഫുട്‌ബോൾ താരവും ഈ ലോകത്ത് ഉണ്ടാകും എന്ന് എനിക്ക് തോന്നുന്നില്ല. അദ്ദേഹത്തിന്റെ കരിയർ,കിരീടങ്ങൾ,പ്രതിഫലങ്ങൾ,സിക്‌സ് പാക്ക് മെസി ഒഴികെ മറ്റെല്ലാ താരങ്ങൾക്കും ക്രിസ്റ്റ്യാനോയോട് അസൂയ തോന്നുമെന്നാണ് റൂണിയുടെ മറുപടി.

മെസിയേക്കാൾ മികച്ച കളിക്കാരൻ താനാണെന്ന് പലപ്പോഴും റൊണാൾഡോ അവകാശപ്പെട്ടിട്ടുണ്ട്. ഇത് ലക്ഷ്യമിട്ടാണ് മെസിക്കൊഴികെ മറ്റെല്ലാ താരങ്ങൾക്കും ക്രിസ്റ്റ്യാനോയോട് അസൂയയാണെന്ന് റൂണി പറഞ്ഞതെന്നാണ് ഫുട്ബോൾ ലോകം വിലയിരുത്തുന്നത്. ഇതോടെ റൂണിക്കൊപ്പവും റൊണാൾഡോയ്ക്കൊപ്പവും എന്ന നിലയിൽ രണ്ട് തട്ടിലായിരിക്കുക‌യാണ് ഫുട്‌ബോൾ ആരാധകർ.