പ്രായമായ സ്ത്രീകളില്‍ മാത്രമല്ല സ്തനാര്‍ബുദം ! ഇക്കാര്യങ്ങള്‍ ശ്രദ്ധിക്കുക
കുട്ടികള്‍ക്ക് കൃത്യമായി മുലപ്പാല്‍ കൊടുക്കാത്തത് സ്തനാര്‍ബുദത്തിലേക്ക് നയിച്ചേക്കാം
സ്ത്രീകളില്‍ വളരെ സാധാരണയായി കണ്ടുവരുന്ന അസുഖമാണ് സ്തനാര്‍ബുദം അഥവാ ബ്രെസ്റ്റ് ക്യാന്‍സര്‍. കുറച്ച് നാള്‍ മുന്‍പ് വരെ 50 വയസ്സില്‍ കൂടുതലുള്ളവരിലാണ് സ്താനര്‍ബുദം വ്യാപകമായി കണ്ടിരുന്നത്. എന്നാല്‍ ഇപ്പോള്‍ 30 വയസ്സില്‍ താഴെയുള്ള സ്ത്രീകളിലും സ്തനാര്‍ബുദം സ്ഥിരീകരിക്കുന്നുണ്ട്. ജീവിതശൈലിയും പൊണ്ണത്തടിയുമാണ് സ്തനാര്‍ബുദത്തിനു പ്രധാന കാരണമായി പറയുന്നത്. ചെറിയ പ്രായത്തില്‍ തന്നെ സ്തനാര്‍ബുദം ബാധിക്കുന്നതിലേക്ക് നയിക്കുന്ന കാരണങ്ങള്‍ എന്തൊക്കെയാണെന്ന് നോക്കാം.
കുട്ടികള്‍ക്ക് കൃത്യമായി മുലപ്പാല്‍ കൊടുക്കാത്തത് സ്തനാര്‍ബുദത്തിലേക്ക് നയിച്ചേക്കാം. പ്രസവ ശേഷം ആറ് മാസമെങ്കിലും കൃത്യമായി കുഞ്ഞുങ്ങള്‍ക്ക് മുലപ്പാല്‍ കൊടുത്തിരിക്കണം.
നേരം വൈകിയുടെ ഗര്‍ഭധാരണം സ്തനാര്‍ബുദത്തിനു കാരണമാകുമെന്ന് പഠനങ്ങളില്‍ പറയുന്നു. ഹോര്‍മോണ്‍ തെറാപ്പിയും ഒരു വെല്ലുവിളിയാണ്.
പുകവലിയും മദ്യപാനവും ഒരുപരിധി വരെ സ്തനാര്‍ബുദത്തിലേക്ക് നയിക്കുന്ന കാരണങ്ങളാണ്. പാരമ്പര്യമായും സ്തനാര്‍ബുദം വരാം. ശരീരഭാരം നിയന്ത്രിക്കാനും സ്ത്രീകള്‍ ശ്രദ്ധിക്കണം. കാരണം, പൊണ്ണത്തടിയും ജീവിതശൈലിയും സ്തനാര്‍ബുദത്തിലേക്ക് നയിച്ചേക്കാം.
സ്തനാര്‍ബുദം തുടക്കത്തില്‍ തന്നെ കണ്ടുപിടിച്ചില്ലെങ്കില്‍ രോഗം രൂക്ഷമാകാനും മറ്റ് ശരീരഭാഗങ്ങളെ കൂടി ബാധിക്കാനും സാധ്യത കൂടുതലാണ്. അര്‍ബുദം തലച്ചോറിലേക്ക് വ്യാപിച്ചാല്‍ തലവേദന, ഛര്‍ദി എന്നിവയെല്ലാം ഉണ്ടാകും. ശ്വാസകോശത്തിലേക്ക് ബാധിക്കുകയാണെങ്കില്‍ ശ്വാസംമുട്ടല്‍, എല്ലിലേക്ക് വ്യാപിക്കുകയാണെങ്കില്‍ നടുവേദന, എല്ല് പൊട്ടുക, വയറിന് വീക്കം എന്നിവയെല്ലാം ഉണ്ടാകുന്നു.
സ്തനത്തില്‍ മുഴ, തടിപ്പ്, കക്ഷത്തില്‍ മുഴ, സ്തനത്തിന്റെ തൊലിയില്‍ നിറ വ്യത്യാസം, മുലക്കണ്ണില്‍ നീര് വന്നുമുട്ടുക, വേദന, വ്രണങ്ങള്‍, സ്തനത്തില്‍ വേദനയില്ലാത്ത മുറിവുകള്‍ എന്നിവയെല്ലാം സ്തനാര്‍ബുദത്തിന്റെ ലക്ഷണങ്ങളാകാം. ഇത്തരം ലക്ഷണങ്ങള്‍ കണ്ടാല്‍ ഉടന്‍ വൈദ്യസഹായം തേടണം.
