നേരത്തെയുള്ള ആര്‍ത്തവവിരാമം, ഹൃദയാരോഗ്യക്കുറവ് എന്നിവ തലച്ചോറിനെ ബാധിക്കുമെന്ന് പഠനം

അത് തലച്ചോറിനെയും വൈജ്ഞാനിക പ്രകടനത്തെയും ഒരുമിച്ച് ബാധിക്കുമെന്നും പുതിയ പഠനം.

നേരത്തെ ആര്‍ത്തവവിരാമം അനുഭവിക്കുന്ന സ്ത്രീകള്‍ക്ക് ഹൃദയാരോഗ്യക്കുറവുണ്ടാകുമെന്നും അത് തലച്ചോറിനെയും വൈജ്ഞാനിക പ്രകടനത്തെയും ഒരുമിച്ച് ബാധിക്കുമെന്നും പുതിയ പഠനം. നേരത്തെയുള്ള ആര്‍ത്തവവിരാമം ബുദ്ധിശക്തി കുറയുന്നതിനും പിന്നീടുള്ള ജീവിതത്തില്‍ അല്‍ഷിമേഴ്സ്, ഡിമെന്‍ഷ്യയ്ക്കും കാരണമാകുമെന്ന് മുന്‍ പഠനങ്ങള്‍ കണ്ടെത്തിയിട്ടുണ്ട്.

പുതിയ പഠനം സൂചിപ്പിക്കുന്നത് നേരത്തെയുള്ള ആര്‍ത്തവവിരാമം ഹൃദയ പ്രവര്‍ത്തനവും ഗ്രേ മാറ്റര്‍ വോള്യവും, വൈറ്റ് മാറ്റര്‍ ഹൈപ്പര്‍ഇന്റന്‍സിറ്റി ബര്‍ഡനും, വൈജ്ഞാനിക പ്രകടനവും തമ്മിലുള്ള ബന്ധത്തെ പ്രതികൂലമായി ബാധിക്കുമെന്നാണ്. ഹൃദയത്തിന്റെ പ്രവര്‍ത്തനം കുറയുന്നത് തലച്ചോറിലേക്കുള്ള ഓക്‌സിജന്റെയും പോഷകങ്ങളുടെയും അവശ്യ വിതരണം പരിമിതപ്പെടുത്തുന്നതിലൂടെ തലച്ചോറിന്റെ ആരോഗ്യത്തെ ബാധിക്കും. 

ഈ രക്തയോട്ടം കുറയുന്നത് തലച്ചോറിലെ കലകളെ തകരാറിലാക്കുകയും നിശബ്ദ സ്‌ട്രോക്കുകള്‍ക്ക് കാരണമാവുകയും ഡിമെന്‍ഷ്യയുടെ സാധ്യത വര്‍ദ്ധിപ്പിക്കുകയും ചെയ്യും. ഇത് ഹൃദയത്തിന്റെയും തലച്ചോറിന്റെയും ആരോഗ്യം തമ്മിലുള്ള നിര്‍ണായക ബന്ധത്തെ കാണിക്കുന്നു.