‘ആമ്പിളയാരുന്താ വണ്ടിയെ തൊട്രാ... പാക്കലാം’ - എസ് ഐ മോഹന അയ്യര്‍ സോഷ്യല്‍ മീഡിയയുടെ മാസ് ഹീറോ!

കേരള - തമിഴ്നാട് അതിർത്തിയിൽ കളിയിക്കാവിളയില്‍ കെ എസ് ആര്‍ ടി സി ബസ് ആക്രമിക്കാനൊരുങ്ങിയ സംഘത്തെ തുരത്തിയത് എസ് ഐ മോഹന അയ്യര്‍. ‘ആമ്പിളയാരുന്താ വണ്ടിയെ തൊട്രാ... പാക്കലാം’ എന്ന് മാസ് ഡയലോഗ് അലറിക്കൊണ്ട് എസ് ഐ പാഞ്ഞടുത്തപ്പോള്‍ അക്രമകാരികള്‍ പിന്‍‌വാങ്ങി.

എസ് ഐയുടെ സമീപനവും ഡയലോഗും സോഷ്യല്‍ മീഡിയയില്‍ തരംഗമായി മാറി. ഇപ്പോള്‍ മോഹന അയ്യരാണ് ഹര്‍ത്താല്‍ വിരുദ്ധരുടെ ഹീറോ. പൊലീസ് ഇങ്ങനെയാണ് പ്രതികരിക്കേണ്ടതെന്നാണ് സോഷ്യല്‍ മീഡിയയില്‍ പരക്കെ ഉയരുന്ന അഭിപ്രായം. 

മോഹന അയ്യരുടെ ഈ പ്രകടനത്തിന് കെഎസ്ആർടിസി എംഡി ടോമിൻ തച്ചങ്കരി അഭിനന്ദനമറിയിക്കുകയും പാരിതോഷികം പ്രഖ്യാപിക്കുകയും ചെയ്തു. പണ്ടുമുതലേ താന്‍ ടോമിന്‍ തച്ചങ്കരിയുടെ ആരാധകനാണെന്നാണ് മോഹന അയ്യര്‍ പ്രതികരിച്ചത്. 

കളിയിക്കാവിളയിൽ‌ ഹർത്താല്‍ ദിനത്തിലാണ് കെ എസ് ആര്‍ ടി സി ബസ് അക്രമിക്കാന്‍ ഒരുകൂട്ടം ആളുകള്‍ എത്തിയത്. അക്രമികളെ കൂസാതെ മോഹന അയ്യര്‍ കളത്തില്‍ നിറഞ്ഞതോടെ അക്രമിക്കാന്‍ വന്നവര്‍ പിന്‍‌വാങ്ങുകയായിരുന്നു.