ഹൃദ്രോഗം ഉണ്ടെങ്കില്‍ കാലില്‍ നീര് വരുമോ ?

നമ്മുടെ പാദങ്ങളില്‍ നീര് വരുന്നത് പലകാരണങ്ങള്‍ കൊണ്ടാകാം. കഠിനമായ വ്യായാമങ്ങളിലോ പ്രവര്‍ത്തികളിലോ ഏര്‍പ്പെടുന്നത് വഴിയോ കാല് മടങ്ങുകയോ മറ്റോ ചെയ്യുന്നതിലൂടെയോ നീര് വരുന്നത് സാധാരണമാണ്. എന്നാല്‍ ഇത് മൂലമല്ലാതെ കാണപ്പെടുന്ന നീര് ചിലപ്പോൾ ഹൃദ്രോഗത്തിന്റെ ലക്ഷണമാകാം.

ഹൃദയമാണ് ശരീരത്തിന്റെ എല്ലാ ഭാഗങ്ങളിലേക്കും രക്തം പമ്പ് ചെയ്യുന്നത് എന്നത് അറിയാവുന്ന കാര്യമാണല്ലോ. എന്നാല്‍ പ്രായമാകും തോറും ശരീരത്തിന്റെ എല്ലാ ഭാഗത്തേക്കും പമ്പ് ചെയ്യാനുള്ള ഹൃദയത്തിന്റെ കഴിവ് കുറഞ്ഞുവരുന്ന അവസ്ഥയുണ്ടാകാം. ഇങ്ങനത്തെ സാഹചര്യത്തില്‍ കാലുകളില്‍ ആവശ്യത്തിന് രക്തം എത്തിചേരാത്ത അവസ്ഥയുണ്ടാകും. ഇതിനെ തുടര്‍ന്ന് ദ്രാവകങ്ങള്‍ കാലില്‍ നിറയുന്നത് കാലിലെ നീരിന് കാരണമാകാം. അതിനാല്‍ തന്നെ സാധാരണഗതിയിലല്ലാതെ കാലില്‍ കാണപ്പെടുന്ന നീര് ചിലപ്പോള്‍ ഹൃദ്രോഗത്തിന്റെ ലക്ഷണം കൂടിയാവാം. അതിനാല്‍ തന്നെ കാലിലെ നീര് എളുപ്പത്തില്‍ അവഗണിക്കാതെ തന്നെ വിദഗ്ധനായ ഒരു ഡോക്ടറെ സമീപിച്ച് പരിശോധിക്കുന്നത് നല്ലതാണ്.