വയറുവേദനയുടെ കാരണം സമ്മര്‍ദ്ദമാണെന്ന് ഡോക്ടര്‍; എട്ടുമാസത്തിന് ശേഷം കാന്‍സര്‍ ബാധിച്ച് യുവാവ് മരിച്ചു

സമ്മര്‍ദ്ദം മൂലമാണ് വേദന ഉണ്ടായതെന്നാണ് ഡോക്ടര്‍ ഇദ്ദേഹത്തോട് പറഞ്ഞിരുന്നത്.

യുകെയില്‍ നാല് കുട്ടികളുടെ പിതാവായ 40 വയസ്സുള്ള യുവാവ് കുടല്‍ കാന്‍സര്‍ ബാധിച്ച് മരിച്ചു. കെന്റ് നിവാസിയായ കൈല്‍ ആണ് മരണപ്പെട്ടത്. എട്ട് മാസത്തിന് മുന്‍പ് അദ്ദേഹത്തിന് വയറുവേദന അനുഭവപ്പെട്ടിരുന്നു. സമ്മര്‍ദ്ദം മൂലമാണ് വേദന ഉണ്ടായതെന്നാണ് ഡോക്ടര്‍ ഇദ്ദേഹത്തോട് പറഞ്ഞിരുന്നത്. കഴിഞ്ഞ വര്‍ഷം ഒക്ടോബറിലാണ് കൈലിന് ആദ്യം വയറുവേദന അനുഭവപ്പെട്ടത്.

പിന്നീട് വേദന വഷളായതിനാല്‍ കൈല്‍ വീണ്ടും ആശുപത്രിയില്‍ എത്തി. അള്‍ട്രാസൗണ്ട് സ്‌കാനിലും സിടി സ്‌കാനിലും അദ്ദേഹത്തിന്റെ കരളില്‍ മുഴകള്‍ കണ്ടെത്തി. അത് കുടല്‍ കാന്‍സര്‍ വളര്‍ന്ന് പടര്‍ന്നതാണെന്ന് കണ്ടെത്തി. രണ്ടാഴ്ചയ്ക്ക് ശേഷം, കൈലിന് നാലാം ഘട്ട കാന്‍സര്‍ ആണെന്ന് ഡോക്ടര്‍മാര്‍ പറഞ്ഞു. 

12, ഒമ്പത്, മൂന്ന്, ഒന്ന് വയസ്സുള്ള നാല് കുട്ടികളുള്ളതിനാല്‍, രോഗത്തെ പരാജയപ്പെടുത്താനുള്ള അവസരം കൈല്‍ വിനിയോഗിച്ചു. ഇതിനായി  ആറ് റൗണ്ട് കീമോതെറാപ്പിക്കും കൂടുതല്‍ ചികിത്സകള്‍ക്കും കൈല്‍ സമ്മതിച്ചു. എന്നിരുന്നാലും, കാന്‍സര്‍ പടരുന്നത് തുടര്‍ന്നു, മാസങ്ങള്‍ക്ക് ശേഷം കൈല്‍ മരണപ്പെട്ടു.