ഇറാന്‍- ഇസ്രായേല്‍ സംഘര്‍ഷം ഒരാഴ്ചയിലേക്ക് കടക്കുമ്പോഴും സംഘര്‍ഷം അയവില്ലാതെ തുടരുന്നു. ഇറാന്‍ നടത്തിയ ആക്രമണത്തില്‍ ഇസ്രായേലിലെ ബീര്‍ഷെബയിലെ സൊറോക്ക ആശുപത്രി തകര്‍ന്നതായി ഇസ്രായേല്‍ പ്രതിരോധ സേന വ്യക്തമാക്കി. സംഭവത്തില്‍ മുപ്പതോളം പേര്‍ക്ക് പരിക്കുണ്ട്. നാലുപേരുടെ നില ഗുരുതരമാണെന്നാണ് റിപ്പോര്‍ട്ട്.
ദക്ഷിണ ഇസ്രായേലിലെ ഏറ്റവും വലിയ ആശുപത്രിയാണ് തകര്‍ക്കപ്പെട്ട ബീര്‍ഷെബയിലെ സൊറോക്കൊ ആശുപത്രി. തകര്‍ന്ന ആശുപത്രിയുടെ ദൃശ്യങ്ങളും വീഡിയോകളും സമൂഹമാധ്യമങ്ങളില്‍ പ്രചരിക്കുന്നുണ്ട്. അതേസമയം ഇസ്രായേല്‍ നടത്തിയ വ്യോമാക്രമണത്തില്‍ ഇറാന്റെ അരാക്കിലെ ഘനജല ആണവ റിയാക്ടറും തകര്‍ന്നു.
വ്യാഴാഴ്ചയാണ് സൊറോക്ക ആശുപത്രിക്ക് നേരെ ആകരമണമുണ്ടായത്. വ്യാഴാഴ്ച മാത്രം ഏകദേശം ഇരുപതോളം മിസൈലുകള്‍ ഇസ്രായേലിനെ ലക്ഷ്യമാക്കി ഇറാന്‍ തൊടുത്തുവിട്ടിരുന്നു. ആശുപത്രിക്ക് നേരെയുണ്ടായ ആക്രമണത്തില്‍ ഇസ്രായേല്‍ ശക്തമായ പ്രതിഷേധം അറിയിച്ചു. സൈനിക താവളമല്ല മേഖലയിലെ പ്രധാന ആശുപത്രിയെയാണ് ഇറാന്‍ ലക്ഷ്യം വെച്ചതെന്നും ലോക രാഷ്ട്രങ്ങള്‍ ഇതിനെതിരെ ശബ്ദമുയര്‍ത്തണമെന്നും ഇസ്രായേല്‍ ആവശ്യപ്പെട്ടു.
